Qazaqstanda 1967 jyly týǵan er adam qaıtys bolǵannan keıin birneshe aǵzasy alynyp, tórt pasıentke transplantattaldy. Bul týraly Transplantattaýdy jáne joǵary tehnologıalyq medısınalyq qyzmetterdi úılestirý jónindegi respýblıkalyq ortalyq habarlady.
Dárigerler pasıentke mıdyń ólimin tirkegennen keıin, otbasynyń kelisimi alynyp, kóp aǵzalyq alý operasıasy uıymdastyryldy. Nátıjesinde júrek, baýyr jáne eki búırek alyndy.
Transplanttaýdy úılestirý brıgadalarynyń jedel jumysynyń arqasynda mynadaı operasıalar jasaldy:
-
júrek 1967 jyly týǵan pasıentke qondyryldy («Kardıologıa jáne İA ǴZI» AQ);
-
baýyr 1967 jyly týǵan naýqasqa transplantattaldy («A. N. Syzǵanov atyndaǵy UǴHO»);
-
oń búırek 2006 jyly týǵan resıpıentke,
-
sol búırek 1990 jyly týǵan pasıentke salyndy (ekeýi de «A. N. Syzǵanov atyndaǵy UǴHO»-da).
Resmı derekke súıensek, qazir el boıynsha kútý paraǵynda 4521 pasıent, onyń ishinde 106 bala bar. 2025 jyldyń alǵashqy 10 aıynda ǵana aǵza kútip júrgen 272 adam kóz jumǵan. Bul shamamen kún saıyn bir adamnyń ómiri úzildi degen sóz.
Bıylǵy 12 aıdyń qorytyndysy boıynsha qaıtys bolǵannan keıingi donorlardan bar bolǵany 14 donorlyq jaǵdaı tirkelip, sonyń nátıjesinde 60 ómirlik mańyzdy aǵza transplantattalǵan.
Transplantattaýdy jáne joǵary tehnologıalyq medısınalyq qyzmetterdi úılestirý jónindegi respýblıkalyq ortalyqtyń dırektory Aıdar Sıtqazınov árbir mundaı jaǵdaıdyń mańyzyn atap ótti:
«Árbir donorlyq jaǵdaı – bul dárigerlerdiń, úılestirýshilerdiń, zerthanalardyń, sanavıasıanyń jáne birneshe mınýt ishinde iske qosylatyn barlyq qyzmetterdiń úlken birlesken jumysynyń nátıjesi. Biraq bastysy – donor otbasynyń sheshimi. Olardyń batyldyǵynyń arqasynda búgin óz múmkindigin jyldar boıy kútken adamdar ómir súrip jatyr», - dedi ol.
Onyń aıtýynsha, Qazaqstanda aǵzaǵa qajettilik áli de óte joǵary.
"Myńdaǵan pasıent transplantattaýdy kútip otyr, al biz kún saıyn derlik kómektese alatyn adamdardan aıyrylyp jatyrmyz. «Sondyqtan ár qutqarylǵan pasıent – jaı ǵana medısınalyq jeńis emes, qaıta oralǵan adam ómiri", – dedi Aıdar Sıtqazınov.