Qazaqstan kásipqoı boks federasıasynyń prezıdenti Rahymjan Erdenbekov dopıngke qatysty is boıynsha tyńdaýlar ótip jatqan kezeńde IBF jáne WBO tujyrymdary boıynsha álem chempıony Jánibek Álimhanulynyń jekpe-jekterge qatysýyna ýaqytsha tyıym salynǵanyn málimdedi, - dep habarlaıdy aqshamnews.kz tilshisi 1bol.kz-ke silteme jasap.
Federasıa basshysynyń aıtýynsha, tyńdaýlar barysynda sportshyǵa kóptegen suraq qoıylǵan.
Sáýirden bastap Jánibektiń tyıym salynǵan zat anyqtalǵanǵa deıingi búkil joly egjeı-tegjeıli qaraldy. Keshe jańa derekter belgili boldy, alaıda olardy ázirge jarıalaı almaımyn. Tyńdaýlar 23 qańtarda jalǵasady, - dedi Erdenbekov.
Onyń sózinshe, isti qaraý qorytyndysy boıynsha barlyq materıaldar tıisti halyqaralyq uıymdarǵa, sonyń ishinde IBF pen WBO uıymdaryna joldanady. Chempıondyq belbeýlerden aıyrý nemese aıyryp almaý jónindegi túpkilikti sheshimdi dál osy uıymdar qabyldaıdy. Al ázirge Jánibek Álimhanuly tyńdaýlar aıaqtalǵanǵa deıin jekpe-jekterden shettetilip otyr.
Eske sala keteıik, byltyr jeltoqsanda qazaqstandyq boksshynyń dopıng synamasynan antıdopıng erejelerimen tyıym salynǵan meldonıı preparaty anyqtalǵan. Osyǵan baılanysty onyń kýbalyq boksshy Erıslandı Laramen úsh birdeı álem chempıondyq belbeýi úshin ótýi tıis jekpe-jegi keıinge qaldyryldy. 8 qańtarda ashylǵan «V» synamasy tyıym salynǵan zattyń bar ekenin qaıta rastady.