Sáýirde satyp alý-satý boıynsha 31 445 mámile tirkelgen
Ulttyq statısıka búrosynyń málimetinshe, bir aıdyń ishinde (sáýirden naýryzǵa deıingi aralyqta) turǵyn úı naryǵynda baǵanyń tómendeýi barlyq segmentte baıqaldy. Atap aıtqanda, jańa turǵyn úıdi satý baǵasy 0,6%, qoldanystaǵy páterlerdi qaıta satý 1,5% tómendedi, dep habarlaıdy Almaty-akshamy.kz.
Abattandyrylǵan turǵyn úıdi jalǵa alý tólemi aldyńǵy aımen salystyrǵanda sáýirde 0,5% arzandady.
Bul rette, sáýirde turǵyn úıdi satyp alý-satý mámileleriniń sany ósti. 2023 jylǵy sáýirde satyp alý-satý boıynsha 31 445 mámile tirkelgen, onyń ishinde jeke úıler boıynsha 8 096 jáne páterler boıynsha 23 349 mámile jasaldy.
2023 jyldyń naýryzymen salystyrǵanda (24 273) turǵyn úıdi satyp alý-satý mámileleriniń sany 29,5%-ǵa ósti.
Mámileler sany boıynsha Almaty (5 559 – 17,7%) jáne Astana (4 772 – 15,2%) qalalary kósh basynda. Mámileler sany Ulytaý oblysynda eń az – 342 birlik (1,1%).
2023 jyldyń naýryz aıymen salystyrǵanda sáýirde eń kóp ósim Qostanaı (46,2%-ǵa), Mańǵystaý (45,5%-ǵa) jáne Aqtóbe oblystarynda (45,2%-ǵa) tirkeldi. Sonymen qatar, oń kórsetkish elimizdiń barlyq aımaǵynda baıqaldy.
2023 jyldyń naýryzymen salystyrǵanda, kóppáterli úılerdegi turǵyn úı mámileleriniń sany 29,7%-ǵa (5 351 mámilege) ósti. Sáýir aıynda páterler boıynsha barlyǵy 23 349 mámile jasaldy, bul mámilelerdiń jalpy sanynyń 74,3%-y.
Statısıka mamandarynyń baǵamynsha, bólmeler sany boıynsha 2 bólmeli páterler satylymy basym boldy, sáýir aıynda olardyń 8 830-y resimdeldi. Saýdanyń negizgi úlesi Almaty jáne Astana qalalaryna (41,2%) tıesili.
2023 jyldyń naýryz aıymen salystyrǵanda, jeke turǵyn úıler boıynsha mámileler sany 29%-ǵa (1 821 mámilege) ósip, 8 096-ny qurady. Ósim barlyq aımaq boıynsha tirkeldi, sandyq mánde eń úlken ósim Almaty (+248 mámile), Mańǵystaý (+142 mámile) oblystarynda jáne Shymkent (+131 mámile) qalasynda baıqaldy.
2023 jyldyń sáýirinde turǵyn úıdi satyp alý-satý mámileleri byltyrǵy tıisti aıymen salystyrǵanda 40,1%-ǵa azaıǵan, ol kezde 52 520 mámile resimdelgen bolatyn.
Tómendeýdiń eń úlken kórsetkishi Qaraǵandy oblysynda (-68,2%-ǵa) baıqaldy.
Sonymen qatar, teris kórsetkish elimizdiń barlyq aımaǵynda tirkeldi.
2023 jyly qańtar-sáýir aılaryndaǵy mámileler sany 2022 jyldyń qańtar-sáýirmen salystyrǵanda da teris dınamıka kórsetti – -48%.