Úkimet músheleri sheteldik ınvestorlarmen kezdesý ótkizdi.
Qazaqstan Úkimetiniń músheleri memleket Prezıdentiniń tapsyrmasyn oryndaý maqsatynda bilim berý salasyndaǵy sheteldik ınvestorlarmen kezdesý ótkizdi, dep habarlaıdy Almaty-akshamy.kz.
«Memleket basshysy Qasym-Jomart Toqaevtyń 11 qańtarda Parlament Májilisiniń otyrysynda jetekshi sheteldik joǵary oqý oryndarynyń kampýstaryn ashý týraly bergen tapsyrmasyn oryndaý maqsatynda búgin Premer-Mınıstrdiń orynbasary Eraly Toǵjanov bilim berý salasyndaǵy sheteldik ınvestorlarmen kezdesý ótkizdi», - delingen Primeminister.kz caıtynda.
Kezdesýge múddeli memlekettik organdardyń ókilderi jáne «Astana» Halyqaralyq qarjy ortalyǵy basqarýshysy Qaırat Kelimbetov qatysty.
Brıtandyq jáne reseılik sheteldik tehnıkalyq joǵary oqý oryndarynyń eki fılıalyn ashý múmkindigi qarastyryldy, olardyń biri AHQO alańynda ashylady.
Fılıaldarda oqytý kadrlar daıarlaýdyń basym baǵyttary boıynsha, sondaı-aq el ekonomıkasynyń qajettiligin eskere otyryp júzege asyrylatyn bolady.
QR Premer-Mınıstriniń orynbasary Eraly Toǵjanov qazaqstandyq taraptyń bedeldi sheteldik ýnıversıtetterdiń fılıaldaryn ashýǵa qajetti kómek kórsetýge daıyn ekenin atap ótti.
Vıse-premer Bilim jáne ǵylym mınıstrligine sheteldik ýnıversıtetterdiń usynystaryn egjeı-tegjeıli zerdeleı otyryp, áleýetti ınvestorlarmen kelissózderdi jedeldetý jóninde naqty tapsyrmalar berdi.
Sondaı-aq Avstrıa men Túrkıa Respýblıkasynyń ınvestısıalyq kompanıalarynyń ókilderimen densaýlyq saqtaý salasyndaǵy ınvestısıalyq jobalardy iske asyrý máseleleri boıynsha kezdesý ótkizildi.
Kelissózder barysynda kópbeıindi aýrýhana ashý, sondaı-aq Qazaqstannyń densaýlyq saqtaý salasynda ınovasıalyq sheshimderdi qoldaný múmkindikteri qaraldy.
Kompanıalardyń usynystaryn Densaýlyq saqtaý mınıstrligi múddeli memlekettik organdarmen birlesip qaraıtyn bolady.