Elimizde 2025 jylǵy 13 sáýirden bastap ata-analar men basqa da jaqyn týystar arasynda balamen qarym-qatynas jasaý tártibine baılanysty daýlardy sheshýdiń biryńǵaı erejesi qoldanysqa engizildi.
Buǵan deıin bul máseleler qorǵanshylyq organdarymen qaralǵanymen, ár óńirde ártúrli tásil qoldanylǵan bolatyn. Endi QR Oqý-aǵartý mınıstrligimen bekitilgen ortaq tártip barlyq óńirde birdeı iske asady, dep habarlaıdy aqshamnews.kz.
Ata-anaǵa nemese jaqyn týystaryna – atasyna, ájesine, aǵasyna nemese ápkesine balamen qarym-qatynas jasaýǵa shekteý qoıylǵan jaǵdaıda, balanyń turǵylyqty jeri boıynsha qorǵanshylyq jáne qamqorshylyq organyna ótinish bere alady.
Ótinishke kelesi qujattar qosa tirkeledi:
• jeke kýáliktiń kóshirmesi;
• narkologıalyq jáne psıhıatrıalyq dıspanserlerden anyqtamalar;
• sottylyǵynyń joqtyǵy týraly anyqtama;
• mekenjaıyn rastaıtyn qujat.
«Biz alǵash ret osyndaı kúrdeli de sezimtal máselelerdi sheshýdiń biryńǵaı tártibin engizip otyrmyz. Bul – balanyń quqyǵy men múddesin qorǵaýǵa, onyń jaqyndarymen baılanysyn úzbeýge baǵyttalǵan naqty qadam», - dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Qorǵanshylyq organy ótinishti 15 jumys kúni ishinde qarap shyǵady. Osy merzimde mamandar eki tarappen jeke sóılesip, qajet bolsa turmystyq jaǵdaıdy zerdeleıdi. Eger bala 10 jasqa tolǵan bolsa, onyń da pikiri eskeriledi.