9 aıda elimizde 299 711 bala ómirge keldi.
Bıylǵy 9 aıda Qazaqstanda 300 myńǵa jýyq sábı dúnıege keldi. Biraq, statısıka kórsetkendeı, ólim kórsetkishi de azaımaı tur, dep habarlaıdy Almaty-akshamy.kz QazAqparatqa silteme jasap.
«Ulttyq statısıka búrosynyń deregine sáıkes, bıylǵy 9 aıda elimizde 299 711 bala ómirge keldi. Bul 2021 jylmen salystyrǵanda 39 059 balaǵa az. Iaǵnı, ótken jyly 9 aıda 338 770 sábı dúnıe esigin ashqan. Ólim-jitimge kelsek, bıyl 9 aıda ol 8,18%-dy qurady. Ótken jyldyń 9 aıynda náreste ólimi 7,92% bolǵan. Bıyl 2021 jylmen salystyrǵanda azdaǵan ósim bar», - degen jaýap berdi Densaýlyq saqtaý mınıstrligi QazAqparat saýalyna.
Sondaı-aq, atalǵan vedomstvo balalar arasynda qandaı aýrýlardyń jıi kezdesetini jaıly málimet usyndy.
«Jedel derekke sensek, balalar arasynda tynys alý aǵzalary aýrýlary, qan jáne qan túzý, as qorytý júıeleri, jaraqattar, ýlaný men syrtqy sebepter áseri saldarynan paıda bolatyn aýrý túrleri jıi kezdesedi», - delingen habarlamada.
Odan bólek, mınıstrlik bala densaýlyǵyna dárigerlerdiń qateliginen zıan kelgen jaǵdaıda qaıda júginý kerektigin aıtty.
«Balanyń densaýlyǵyna medısına qyzmetkeriniń tarapynan zalal keltirilgen jaǵdaıda, onyń ata-anasy nemese zańdy ókili mınıstrliktiń Medısınalyq jáne farmasevtıkalyq baqylaý komıtetine júgine alady. Qazaqstan Respýblıkasynyń 2015 jylǵy 29 qazandaǵy Kásipkerlik kodeksiniń 3-babynyń 3-tarmaqshasyna sáıkes, quqyǵy buzylǵan jeke jáne zańdy tulǵalardyń ótinishin jáne memlekettik organdardyń ótinishterin qospaǵanda, adam ómirine, densaýlyǵyna, qorshaǵan ortaǵa jáne jeke, zańdy tulǵalardyń, memlekettiń zańdy múddelerine zıan keltirilgeni týraly naqty faktiler boıynsha jeke jáne zańdy tulǵalardyń ótinishteri tirkelgen jaǵdaıda jospardan tys tekserý júrgiziledi», - deıdi vedomstvo.