Almatyda áıel beıtanys qyzdy aldap, altynyn urlap ketken.
Alaıaqtyq jasady degen kúdikke ilingen 34 jastaǵy M.esimdi azamtashany ustaý kezinde tórt altyn saqına tárkilendi, dep habarlaıdy Almaty-akshamy.kz Polisia.kz-ke silteme jasap.
«Jábirlenýshiniń aıtýynsha, kóshede belgisiz áıel oǵan jaqyndap, onyń boıynda óte aýyr dýa bar ekenin aıtyp, ákesi aýyryp qalatynyna sendirgen. Sondyqtan dereý arnaıy rásim jasaý arqyly dýany alyp tastaý kerektigin aıtqan. Qyz oılanbastan úıine baryp, bar altyn buıymdaryn jınap, beıtanys áıelge beredi. Jedel izdestirý is-sharasy barysynda kúdikti qamaýǵa alyndy. Altyn buıymdar aıǵaqty zat retinde tárkilenip, qylmystyq is materıaldaryna tirkeldi. Keltirilgen shyǵyn kólemi shamamen 250 myń teńgeni qurady. Qazirgi ýaqytta tergeýshiler aıǵaqtardy anyqtap, ustalǵan azamatshanyń buryn jasalǵan osyǵan uqsas qylmystarǵa qatysy bar-joǵyn anyqtap jatyr», – dedi Almaly aýdandyq polısıa basqarmasynyń bastyǵy Esen Ysqaqov.
Aıtpaqshy, kúdiktiniń buǵan deıin osyǵan uqsas qylmystardy jasaǵany úshin sottylyǵy bolǵan. Al tártip saqshylary ustalǵan azamatshanyń sýretin muqıat qarap, ony tanyǵan jaǵdaıda myna telefon nómirlerine habarlasýǵa shaqyrady: 8-708-707-92-02; 8-775-106-18-84.