Sıfrlyq damý, ınovasıalar jáne aeroǵarysh ónerkásibi mınıstrligi el turǵyndarynyń týýynan bastap ólimine deıin tirkeý qyzmetin aqyly etýdi usynady.
Tıisti buıryq jobasy 24 sáýirge deıin Ashyq NQA portalynda qoǵamdyq talqylaýǵa qoıylǵan, dep habarlaıdy Almaty-akshamy.kz.
Elimizde balanyń týýyn memlekettik tirkeý, áke bolýdy (ana bolýdy) belgileýge, balany asyrap alýǵa, atyn, tegin jáne ákesiniń atyn ózgertýge baılanysty týýdy memlekettik tirkeý, sondaı-aq neke qıýdy, ózara kelisim boıynsha nekeni buzýdy memlekettik tirkeý aqyly bolýy múmkin.
Qoǵamdyq talqyǵa shyǵarylǵan buıryqtyń qosymshasynda Azamattyq hal aktilerin memlekettik tirkeý salasyndaǵy jekelegen jumystardyń baǵasy kórsetilgen.
Qujatqa sáıkes, balanyń týýyn memlekettik tirkeý - 8 433,89 teńge (QQS-pen eseptegende), neke qıýdy (erli-zaıyptylyqty) memlekettik tirkeý - 9 667,42 teńge (QQS-pen eseptegende), ózara kelisim boıynsha nekeni buzýdy memlekettik tirkeý - 9 775,39 teńge (QQS-pen eseptegende), ólimdi memlekettik tirkeý - 8 833,58 teńge (QQS-pen eseptegende) kóleminde baj salyǵy tólenedi.
Buıryq jobasy 24 sáýirge deıin qoǵamdyq talqylaýda.