Endi sýbsıdıalaý prosesi 1 aıǵa deıin qysqarady.
Elimizde aýyl sharýashylyǵyna memleketten sýbsıdıa alý prosesi jeńildeı túspek. Bul týraly QR Aýyl sharýashylyǵy mınıstri Erbol Qarashókeev málim etti, dep habarlaıdy Almaty-akshamy.kz QazAqparatqa silteme jasap.
«Memleket basshysynyń tapsyrmasyna sáıkes, aýyl sharýashylyǵy salasyn sýbsıdıalaý máselelerin quramynda 160-tan astam maman bar jumys toby qarap jatyr. Osyǵan deıin 9 otyrys ótti. Sala mamandarynyń ótinish-usynystary nazarǵa alynyp, sýbsıdıalaý salasyna ózgerister engizildi. Aıtar bolsaq, atalǵan salada sybaılas jemqorlyq áreketteriniń aldyn alý maqsatynda sýbsıdıa tolyqtaı elektrondy formatqa kóshedi. Iaǵnı sýbsıdıaǵa ótinish berý, qabyldaý jáne somany rastaý adamnyń qatysýynsyz ótedi», - dedi Erbol Qarashókeev Májiliste ótken dóńgelek ústel barysynda.
Mınıstrdiń sózine sensek, buǵan deıin aýyl sharýashylyǵy salasyn sýbsıdıalaý prosesi 3-4 aı ýaqyt alsa, endi 1 aıǵa deıin qysqarady.
«Baqylaý organdary tarapynan aıtylǵan eskertýlerge qulaq asyp, tıimsiz, ózekti emes jáne baqylaýy qıyn sýbsıdıa túrleri qysqartyldy. Qarjy bólýge kelsek, aýyl sharýashylyǵy salalary boıynsha sol burynǵy somalar saqtalyp qalady. Baǵytyna qaraı 15 paıyzdan 80 paıyzǵa deıin ınvestısıalyq sýbsıdıa qarastyrylǵan», - deıdi ol.
Aıta ketsek, Májiliste «Agroónerkásiptik keshendi sýbsıdıalaýǵa arnalǵan jańa tásilder» taqyrybynda dóńgelek ústel ótip jatyr.
Jıynǵa qatysýshylar aýyl sharýashylyǵy salasyn sýbsıdıalaýdaǵy problemalar, ımportty almastyrý perspektıvalary, ónim baǵasyn qalyptastyrý jáne basqa máselelerdi talqylap jatyr.