Qazirgi ýaqytta aqaý shyqqan jer anyqtaldy
Petropavlda taǵy sý qubyry jarylyp, jurtty ábigerge saldy. Qysymnyń azdyǵynan Jumysshy kenti men "Bereke" shaǵynaýdany tirshilik nárinsiz qaldy. Apattyń qatty bolǵan sonshalyq, qalaǵa kireberistegi jol men úılerdi sý basqan, dep habarlaıdy Almaty-akshamy.kz Almaty.tv-ge silteme jasap.
Tún jarymda 314-atqyshtar dıvızıasy kóshesinde qubyr jarylyp, qalada sý qysymy tómendegen. Dıametri 800 mm-di quraıtyn jabdyqtan jan-jaqqa jaıylǵan sý jaqyn mańaıdaǵy turǵyn úılerge deıin jetipti. Apattan zardap shekken Andreı Chernov jertólede saqtalǵan azyq-túliktiń bári sýǵa ketip, jaramsyz bolyp qalǵanyn aıtady.
«Túngi saǵat 3:40 kezinde kórshim habalasyp, sý basyp jatqanyn aıtty. Sý tizemnen sál tómendeý jerden keldi. Jertóledegi zattyń bári kereksiz bolyp qaldy. Ary qaraı ne bolatynyn bilmeımin», – dedi qala turǵyny Andreı Chernov.
Sý qubyryndaǵy apattan qysym tómendep, qala birneshe saǵatqa sýdan ajyratyldy. Jóndeý brıgadasy keı jerdegi jaǵdaıdy rettep, Jumysshy kenti men "Bereke" shaǵynaýdanynan basqasyn sýǵa qosty. Eldi meken turǵyndary jazda sapasyz jasalǵan jóndeý jumystarynyń kesirinen apat jıi bolatynyn aıtyp shaǵymdandy.
«Jaǵdaı bizdi qatty alańdatady. Ne tamaq pisire almaısyń, ne jýyna almaısyń. Úıde eki qart kisi bar. Sý alý úshin dúkenge baryp júrmiz. Apattyń jıilep ketkeni yńǵaısyzdyq týǵyzady», – dedi qala turǵyny Vera Dmıtrıeva.
Qysymnyń tómendigine baılanysty "Bereke" shaǵynaýdany men Jumysshy kentindegi bilim berý oryndary da sýsyz qaldy. № 31 mektep dırektorynyń aıtýynsha, sý arnaıy kólik arqyly mektepke jetkizilip, oqýshylar qalypty rejımde oqyp jatyr. Al «Qyzyljar sý» jaýapkershiligi shekteýil seriktestigi atqarýshy dırektorynyń aıtýynsha, qalypqa keltirý jumysy kún raıynyń salqyn bolýyna baılanysty qıyndap ketken. Biraq shamamen 1 táýlik ishinde qysymy tómen aýdandarǵa sý qosýymyz múmkin dep sendirdi.
«Biz turǵyndardy sýmen qamtamasyz etý úshin qysymdy arttyrýǵa tyrysamyz. Qazir apat shyqqan oryndy jóndeýge kiristik. Qýat qory jetkilikti. Kerek-jaraqtyń bári aldyn ala satyp alyndy», – dedi «Qyzyljar sý» JSHS atqarýshy dırektory Arman Saýytov
Apat bolǵan jerde qubyrlardy jóndeý jumystary 2009 jyly júrgizilgen. Sol kezde jumys jasaǵan merdigerdiń joqtyǵyna baılanysty qalypqa keltirý shyǵyny «Qyzyljar sý» kompanıasyna júktelip otyr. Aıta keteıik, bir jarym aıdyń ishinde Petropavlda 3 apat boldy.