Tanzanıa astanasy Dar-es-Salamda CISM halyqaralyq áskerı sport keńesiniń 79-shy Bas assambleıasy men kongresi ótti.
Álemdegi eń iri pánaralyq sport uıymdarynyń biri sanalatyn Conseil International du Sport Militaire 140 eldiń áskerı qyzmetshilerin biriktiredi. Uıymnyń «Sport arqyly dostyq» degen urany CISM-tiń negizgi maqsaty beıbitshilikti nyǵaıtý quraly retinde Qarýly kúshter arasyndaǵy sport pen dene shynyqtyrýdy damytý ekenin kórsetedi, dep habarlaıdy Almaty-akshamy.kz QR Qorǵanys mınıstrligine silteme jasap.
Jıynǵa qatysýshylardyń baıandamalarynda sporttyń dıplomatıalyq qural retindegi yqpalyna jáne sportty damytý strategıalaryna basa nazar aýdaryldy. Sonymen birge 2025 jylǵa arnalǵan is-sharalar josparyn bekitý máseleleri talqylandy.
QR QM Sport komıtetiniń tóraǵasy – Ortalyq sport klýbynyń bastyǵy polkovnık Arman Ábeýov qazaq kúresinen áskerı qyzmetshiler arasynda CISM birinshi Álem chempıonatyn 2025 jylǵy josparǵa engizý máselesi boıynsha baıandama jasady. Ol qazaq kúresiniń tarıhy týraly aıtyp, mundaı týrnırdi ulttyq sportty damytý jáne qazaq kúresin álemdik deńgeıde nasıhattaý maqsatynda ótkizý josparlanyp otyrǵanyn atap ótti. Eń kóne ulttyq sport túri ári halqymyzdyń mádenı qundylyǵy retinde balalar men jastar arasynda keńinen tanymaldyǵyna jáne búkilálemdik IýNESKO uıymy moıyndaǵanyna toqtaldy.
"Bizdiń elimiz iri sporttyq is-sharalardy ótkizýde tájirıbege baı. Sol sebepti elordada álem chempıonatyn laıyqty uıymdastyrýǵa bar kúshimizdi salamyz. Bizge kórsetilgen senimi úshin álemdik kúres uıymyna alǵysymdy bildirgim keledi. Áskerı sport dástúrlerin nyǵaıtý men arttyrý isinde áriptestikti odan ári jalǵastyra beremiz", – dep atap ótti polkovnık Arman Ábeýov.
Kongres pen assambleıa aıasynda Túrkıa, Qytaı, Ońtústik Koreıada Qazaqstan Qarýly kúshteriniń dene shynyqtyrý jáne sport mamandaryn oqytý men biliktiligin arttyrý týraly aldyn ala ýaǵdalastyq ta bar.