Almatyda 20 jyldan astam ýaqyt boıy jóndeý júrgizilmegen Terenkýr abattandyrylady, dep habarlaıdy almaty-akshamy.kz
Almatyda Terenkýr saıabaq aımaǵy sý aıdynynyń aınalasyndaǵy jalpy aýdany 3,4 ga ýchaskeni rekonstrýksıalaý bastalady. Bul aımaq Táttimbet kóshesi men Dostyq dańǵylyna jaqyn mańdaǵy shyǵys bólikte ornalasqan.
Munda keń demalys aımaǵy, toǵan boıyndaǵy serýendeý joly jáne ótpeli kópir bar. Ádemi toǵannyń aýmaǵynda sýdyń janynda óner kórsetýge arnalǵan sahna bolady. Oǵan qarama-qarsy zamanaýı ashyq amfıteatr ornalasady.
Terenkýrdaǵy áıgili rotonda da ózgeredi, ol 20 jyl ishinde múldem qaraýsyz qalǵan.
Kelýshilerdiń jaılylyǵy úshin jańa balalar jáne sport alańdary, oryndyqtar men ýrnalar, jaryqtandyrý tirekteri ornatylady. Aýdany 19,6 myń m2 ýchaskeni kógaldandyrý, 2,8 myń m2 trotýar plıtalaryn tóseý jáne avtosýarý júıesin engizý boıynsha jumystar josparlanǵan.
Rekonstrýksıa aıasynda toǵandy abattandyrý da qarastyrylǵan, osyǵan baılanysty qazirgi ýaqytta sý joq. Jumys aıaqtalǵannan soń sý beriledi. Rekonstrýksıa maýsym aıynyń basynda bastalyp, aǵymdaǵy jyldyń sońyna deıin aıaqtalady.
Jańarǵan qoǵamdyq keńistik ýchaskeni almatylyqtar men qala qonaqtary úshin jaıly jáne tartymdy demalys aımaǵyna aınaldyrady.
Aıta keterligi, Terenkýrdaǵy densaýlyq soqpaǵy 1974 jyly salynǵan. Bul aýmaq jeke menshikte boldy jáne jóndeý jumystary 20 jyldan astam ýaqyt boıy júrgizilmegen. 2023 jyly ýchaske komýnaldyq menshikke qaıtaryldy, sodan keıin rekonstrýksıalaý jóninde jobalaý-smetalyq qujattamany ázirleý jumystary bastaldy.