Megapolıste 700-den asa sanaq qyzmetkeri oqytyldy
QR Strategıalyq josparlaý jáne reformalar agenttigi Ulttyq statısıka búrosynyń basshysy Nurbolat Aıdapkelov Almaty qalasynyń 2021 jyldyń Ulttyq sanaqqa daıyndyq jumystarymen tanysty.
2021 jyldyń Ulttyq sanaǵynyń negizgi kezeńi 1 qyrkúıek pen 30 qazan aralyǵynda júrgiziledi. Degenmen turǵyn jaı retinde qoldanylatyn turǵyn úıler men turǵyn emes orynjaılardyń tizimin aldyn ala naqtylap alý qajet. Daıyndyq kezeńi 1–30 maýsym aralyǵynda júrgiziledi.
Qazirgi tańda qalada 48 nusqaýshylyq jáne 618 tirkeý ýchaskeleri qurylǵan. 4 mamyrdan bastap 37 nusqaýshymen ulttyq sanaqqa daıyndyq júrgizý jáne ótkizý boıynsha eńbek sharttary jasalǵan. Sondaı-aq, nusqaýshy baqylaýshylarmen, suhbattasýshylarmen aqyly qyzmet kórsetý kelisimsharttary jasalǵan. Sanaqty sapaly ótkizý maqsatynda barlyq sanaq qyzmetkeri – 703 adam Almaty qalasynyń statısıka departamentiniń bazasynda oqytyldy.
Qazirgi ýaqytta sanaq qyzmetkerleri tolyqtaı oqytylyp, orynjaılarmen, kompúterlermen, jıhazdarmen qamtamasyz etildi. Kompúterleri Memlekettik organdardyń biryńǵaı kólik ortasyna qosyldy. Árbir qyzmetker jeke qorǵanys quraldarymen qamtylǵan. Qalalyq avtokólikte tegin júrý máselesi sheshildi. Árbir nusqaýshylyq jáne tirkeý ýchaskesine ýchaskelik polısıa ınspektory bekitilgen.
Nurbolat SERǴALIULY, Ulttyq statısıka búrosynyń basshysy:
– Elimiz Táýelsizdigin alǵaly bıyl úshinshi ret halyq sanaǵy ótedi. Bizdi úlken jumys kútip tur. Tek Almatynyń ózinde bizdiń suhbattasýshylarymyz sanaqqa deıin 600 myńnan astam turǵyn jáne turǵyn emes oryn jaılardy aralap shyǵýy kerek. Bul óte mańyzdy kezeń. Suhbattasýshylarǵa beriletin júktemeniń durys bólinýi men turǵyn sanynyń negizgi sanaq kezeńinde tolyq esepke alynýy osy jumystarǵa baılanysty bolmaq. Qalada sanaq qyzmetkerlerin qabyldaý kezinde ol týraly departamenttiń saıtyna jáne áleýmettik jelige, turǵyndardy jumyspen qamtý ortalyǵynyń, «Eńbek elektrondy bırjasy» AJ-niń áleýmettik jelilerine habarlandyrýlar berildi. JOO-na, jastar uıymdaryna hattar jiberildi. Sondaı-aq, jumysqa ornalastyrý jónindegi jeke saıttarǵa habarlandyrýlar shyǵaryldy. Bıylǵy halyq sanaǵynyń basty ereksheligi – 1 qyrkúıek pen 15 qazan aralyǵynda onlaın-sanaq ótýge múmkindik bolady. Eń aldymen, arnaıy sanaq.gov.kz saıtynda júrgiziledi. Ekinshiden, egov.kz elektrondy úkimet portaly arqyly sanaqqa qatysýǵa bolady. Úshinshiden, biz sanaq júrgizýge yńǵaıly arnaıy baǵdarlama daıyndalýda. Tamyz aıyna deıin baǵdarlama daıyn bolsa halyq sanaǵyn sol baǵdarlama arqyly júrgizýge múmkindik bolady.
Aıdar Ahmetbekuly, QR Strategıalyq josparlaý jáne reformalar agenttigi Ulttyq statısıka búrosynyń Almaty qalasy boıynsha departamentiniń basshysy:
– Halyq sanaǵy boıynsha jumystyń qarqyny jaman emes. Sanaq qyzmetkerleri qalanyń 68 paıyz turǵyn úılerin aralap úlgerdi. Bul jumys kelesi aptanyń aıaǵyna deıin bitip qalady. Jalpy, 703 adam qarastyrylǵan, onyń ishinde 618 suhbatshy úı-úıdi aralap jumys júrgizý ústinde. Onyń ústine suhbatshylardy qadaǵalaıtyn nusqaýshylar bar. Odan basqa sanaq jumystaryn uıymdastyratyn arnaıy ýákilder bar. Aldyn ala alynǵan málimet boıynsha, sanaq qyzmetkerleri turǵyndar turýy múmkin 631 083 turǵyn jáne turǵyn emes orynjaılardy aralaýy kerek. 2021 jyldyń 18 maýsymyna sanaq qyzmetkerleri aralaǵan úılerdiń, turǵyn úılerdiń, ǵımarattardyń jáne turý úshin paıdalanatyn turǵyn emes orynjaılardyń sany 401 168 nysan (64%) boldy. Munda turatyn turǵyndar sany – 1113450 adam.
