Qazaqstanda Densaýlyq saqtaý mınıstrligi, Eýrazıalyq turaqtandyrý jáne damý qory jáne DDU-nyń Qazaqstandaǵy eldik ofısiniń qoldaýymen ana men balaǵa medısınalyq kómekti jaqsartý jáne ana sútimen qorektendirýdi qoldaý baǵdarlamasynyń jańa kezeńi iske qosyldy.
Ana men bala densaýlyǵyn qorǵaý salasyndaǵy medısınalyq kómekti jetildirýge, medısına qyzmetkerleriniń biliktiligin arttyrýǵa jáne emizýdi qoldaýdyń halyqaralyq standarttaryn engizýge erekshe kóńil bólinedi, dep habarlaıdy aqshamnews.kz.
«Ana sútimen qorektendirý — náresteni tamaqtandyrýdyń tabıǵı tásili ǵana emes, sonymen qatar onyń densaýlyǵy men tolyqqandy damýynyń mańyzdy negizi. Ana sútimen qorektendirý ınfeksıalyq aýrýlar qaýpin tómendetedi, ımýnıtetti kúsheıtedi jáne ana men balanyń arasyndaǵy tyǵyz baılanysty qalyptastyrady. Ana sútimen qorektendirýdi qoldaý — tek medısına júıesi deńgeinde ǵana emes, búkil densaýlyq saqtaý salasyndaǵy memlekettik saıasattyń da basym baǵyty», — dedi QR Densaýlyq saqtaý mınıstri Aqmaral Álnazarova.
Baǵdarlama júktilik jáne erte shaqtaǵy balalarǵa kómek kórsetetin 400 medısına qyzmetkeri — dárigerler, akýsherler men meıirgerler arnaıy oqýdan ótedi. Oqý Astana medısına ýnıversıtetiniń neonatologıa kafedrasynyń bazasynda ótkizilip, elimizdiń túkpir-túkpirinen mamandardy qamtıdy.
«Ana men bala densaýlyǵyn jaqsartý — bul adam quqyqtaryna negizdelgen jáne densaýlyq saqtaý qyzmetterimen jalpy qamtýdy alǵa jyljytýǵa tyǵyz baılanysty DDU-nyń basty basymdyqtarynyń biri. DDU áıelderdiń qundylyqtary men tańdaýlary kómek kórsetý úderisiniń negizinde turatyn densaýlyq saqtaý júıesin josparlaýdy qoldaıdy. Áıelderdiń, otbasylardyń, qoǵamdastyqtar men medısına qyzmetkerleriniń shynaıy qatysýy men quqyqtaryn keńeıtý — medısınalyq kómektiń sapasyn arttyrýǵa baǵyttalǵan bastamalardyń tabysty bolýynyń mańyzdy sharty», — dedi DDU-nyń Qazaqstandaǵy eldik ofısiniń basshysy Skender Syla.
Sonymen qatar, 50 medısınalyq uıym «Balaǵa meıirimdi aýrýhana» halyqaralyq mártebesine sáıkestigi turǵysynan tekserýden ótedi.