Jetisý aýdanyna qarasty №108 mektep-gımnazıasynyń oqýshylary úshin «Tumar» etno-lageri 26 mamyr men 9 maýsym aralyǵynda erekshe joba aıasynda ulttyq rýhty jańǵyrtyp, óz jumysyn bastady.
Bul lager – tek jazǵy demalystyń qyzyqty ótýine ǵana emes, ulttyq qundylyqtardy júrekke sińirýge baǵyttalǵan taǵylymdy bastama ispetti. Mektep aýlasynda kıgiz úı tigilip, ishi kórkem bezendirilgen. Erekshe talǵammen bezendirilýiniń ózi naǵyz qazaqı bolmysqa saı jasalǵan. Kıiz úıge bas suqsańyz – tunyp turǵan tarıhqa kenelesiz. Munda mektep oqýshylary tek ulttyq oıyn oınap qana qoımaı, ata dástúrimen astasqan ónerdi kózben kórip, kóńilge toqıdy. Eń bastysy sol kórkem ónerdi óz qoldarymen jasap kóredi. Mine, az ǵana ýaqyt ishinde balalar baýyrsaq pen qurt daıyndap, dombyra tartýdy da úırenip aldy. Tarıhqa boılap, sándik-qoldanbaly ónerdiń qyr-syrymen tanysty. Munyń barlyǵy – ata-baba murasyn jas býynnyń sanasyna sińirýdiń naqty qadamy.
«Tumar» etno-lageriniń maqsaty – ultymyzdyń tarıhy men mádenıetin, rýhanıaty men salt-dástúrin dáripteı otyryp, balanyń boıyna eljandylyq pen ulttyq sananyń dánin sebý. Bul ıgi bastama arqyly tól mádenıetimizdi tereńirek tanytyp, qazaqy bolmysty jańǵyrtý kózdelip otyr. Lagerdegi demalys barysynda oqýshylar «Bes asyq» sekildi ulttyq oıyndy úırenip, ulttyq qundylyqty boıyna sińire bastady.
Jalpy, «Bes asyq» – uqyptylyq pen dáldikti, shapshańdyq pen eptilikti talap etetin kóne oıyn. Sondyqtan bolar balalardyń da qyzyǵýshylyǵy erekshe. Lagerdi uıymdastyrýshylardyń sózinshe, ulttyq oıyn arqyly balanyń sana-sezimin damytý kózdelip otyr. Sonymen qatar, oqýshylar kúnde «Qara jorǵa» bıin bılep, ulttyq bı elementteri arqyly symbattylyqqa, salaýatty ómir saltyna qadam basty. Mundaǵy árbir qımylda – qazaqtyń myńjyldyq murasy, ár yrǵaqta – halqymyzdyń rýhy sezildi. Balalar úshin arnaıy ulttyq oıyndar, baıqaýlar men vıktorınalar uıymdastyryldy. Aspan astyndaǵy oıyndar men kıiz úı ishindegi atmosfera, sheberlik sabaqtarynyń tárbıelik máni zor. Oqýshylar tek oıyn oınap qomaı, ulttyq rýh pen salt-dástúrdiń tereń tamyryna boılary sózsiz.
Qazaqta «Jastaıynan úıretseń – tasqa oıǵan tańbadaı»,- degen támsil tekke aıtylmasa kerek. «Tumar» etno-lageri – ónegeniń, ata-baba amanatyna degen adaldyqtyń kórinisi. Mundaı bastamalar – ulttyń rýhanı tamyryn úzbeı, keler urpaqqa jol silteıtin shamshyraq ispetti.