Festıvál barysynda sheberlik saǵattary, dárister, shyǵarmashylyq zerthanalar, dızaınerler, sýretshiler men ıllústratorlardyń kórmeleri, qolónershiler jármeńkeleri ótedi. Sonymen qatar ártister sahnada óner kórsetip, bilim berý mekemeleri, qalalyq bastamalar, bıznes pen qoǵamdyq uıymdar jobalaryn tanystyrý sekildi 100-den astam is-shara josparlanǵan.
Ulttyq kreatıv festıvaliniń maqsaty – el turǵyndary men qonaqtaryna qatysýshylardy tanystyryp, kreatıvti ındýstrıanyń damýyn qoldaý. Búginde bul sala álemniń kóptegen elinde jańa jumys oryndarynyń ashylýyna, bıznestiń damýyna, mádenı qundylyqtardy jahanǵa tanytýǵa jáne ınovasıaǵa oń áser etetin qozǵaýshy kúsh retinde tanyldy.
BUU málimeti boıynsha, jahandyq deńgeıde kreatıvti ındýstrıaǵa álemdik JİÓ-niń shamamen 3,1%-y tıesili jáne bul salada eńbekke qabiletti halyqtyń 6,2%-y jumys isteıdi. Olardyń ishinde jastar úlesi erekshe. Sarapshylardyń boljamy boıynsha, 2030 jylǵa qaraı bul sala álemdik JİÓ-niń 10%-yn quraýy múmkin. Al Qazaqstanda 2029 jylǵa deıin kreatıvti ındýstrıanvń el ekonomıkasyna qosatyn úlesi 2%-ǵa deıin ósedi dep kútilýde.
BUU Bas Assambleıasy 2017 jyly 21 sáýirdi Dúnıejúzilik kreatıv pen ınovasıalar kúni dep jarıalaǵan bolatyn. Bul kúnniń maqsaty — shyǵarmashylyq jumystyń ómirdiń barlyq salalaryndaǵy mańyzyna nazar aýdarý.
Festıváldi uıymdastyrý komıteti atap ótkendeı, Qazaqstannyń Dúnıejúzilik kreatıv kúnin atap ótýi — eldiń kreatıvti ekonomıkaǵa kórsetken qoldaýy men mádenıet, bilim, ınovasıalar salasynda halyqaralyq seriktestik jolyndaǵy mańyzdy qadam. Uıymdastyrýshylar 2026 jyly festıvál aıasyn keńeıtip, eldiń barlyq óńirlerin qamtýdy josparlap otyr.