21 sáýirde Astana qalasyndaǵy «Keruen» saýda-oıyn-saýyq ortalyǵynda ornalasqan Kinopark kınoteatrynda «90+1» kınokartınasynyń jabyq kórsetilimi ótti. Sharanyń ashylýynda Mádenıet komıteti tóraǵasynyń orynbasary Aıdyn Qapashev otandyq kınoındýstrıanyń damýy men jańa sporttyq baǵyttaǵy fılmge qatysty oıyn ortaǵa saldy, dep habarlaıdy aqshamnews.kz
«Memleket basshysy Qasym-Jomart Toqaev ulttyq mádenıetimizdi jańǵyrtý, tarıhı sanany qalyptastyrý jáne óskeleń urpaqty tárbıeleý isinde kınonyń róli erekshe ekenin birneshe márte atap ótti. Óıtkeni kıno – tek óner týyndysy ǵana emes, ol – ulttyq bolmysty aıqyndaıtyn qýatty qural. Osy oraıda memleket tarapynan áleýmettik, tarıhı taqyryptardy, otbasylyq qundylyqtardy qaýzaıtyn mazmundy kınojobalarǵa erekshe kóńil bólinip keledi. Bul – el bolashaǵy úshin jasalyp jatqan mańyzdy qadam.
Búgin nazarlaryńyzǵa usynylyp otyrǵan «90+1» fılmi de – osy baǵyttaǵy mańyzdy týyndylardyń biri. Fılm Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen jaryqqa shyqty. Biz bul týyndyny tek jastar ǵana emes, árbir ata-ana, árbir otbasy kórse eken deımiz. Sebebi balanyń boıyndaǵy senimdi oıatý – tek sózben emes, ónegemen keledi. Al ónege osyndaı mándi de maǵynaly týyndylar arqyly beriledi», – dedi A.Qapashev.\
Atalǵan jobany «SBA Enterprise» kınokompanıasy júzege asyrdy. Kınokartınanyń rejıseri – «Bıznes po-kazahskı», «Ákim» sekildi jobalarmen tanylǵan Tımýr Dýlatov. Basty rólderdi Qýanysh Kerimqulov, Almat Saqatov jáne tanymal bloger Artýr Asqaruly somdaıdy.
«Buǵan deıin Kıno ortalyq qoǵam úshin mańyzdy 117 kartınaǵa qoldaý kórsetip, kórermenge sapaly, áleýmettik baǵyttaǵy, tarıhı, otbasylyq qundylyqtardy dáripteıtin, sonymen qatar balalarǵa arnalǵan mazmundy kontent usynýǵa úles qosty.
«90+1» fılmi – jastar men jasóspirimderge arnalǵan motıvasıalyq týyndy. Fılm arqyly: «Qandaı jaǵdaı bolsa da, armanyńnan bas tartpa!» degen basty oıdy jetkizgimiz keledi. Bul arqyly biz ártúrli jastaǵy kórermenniń suranysyn eskerýdi maqsat etemiz. Qazirgi tańda Ulttyq kıno ortalyǵy memlekettik qoldaýǵa úmitker kınojobalardy irikteý konkýrsynyń ekinshi kezeńin bastady. Bıyl da biz sapaly týyndylardy qoldaýǵa kúsh salatyn bolamyz», – dedi Ulttyq kınony qoldaý memlekettik ortalyǵy basqarma tóraǵasynyń orynbasary Ádilet Omarov.
Fılm sújetine kelsek, basty keıipkerdiń ata-anasy jol apatyna ushyrap, oǵan otbasynyń tiregi ári súıenishi bolýǵa týra keledi. Fýtbol dese, janyn beretin jigittiń bala kúngi armanynan qol úzgisi joq. Týyndy shytyrmanǵa toly hıkaıaǵa negizdelgen.
«90+1» – bul tek sporttyq drama emesiz qandaı qıyndyq bolmasyn, armanǵa jetýge bolatynyn kórsetkimiz keledi. Bul – ata-analarǵa da «balalaryńyzǵa senińizder, qoldaý kórsetińizder!» degen úndeý», – dedi fılmniń senarısi jáne basty róldi somdaýshy Qýanysh Kerimqulov.
Aıta keteıik, «90+1» fılmi 2025 jylǵy 24 sáýirden bastap Qazaqstannyń barlyq óńirlerinde keń kólemdi prokatqa shyǵady.