Otandyq ázirleme joǵary synyp oqýshylary men kolej stýdentterine naǵyz kómekshi bolmaq.
Qosymsha jastarǵa elimizdiń joǵary oqý oryndary men memlekettik jáne basqa da granttyq baǵdarlamalar týraly barlyq aqpardy bilip, kórip otyrýǵa múmkindik beredi, dep habarlaıdy Almaty-akshamy.kz Qazaqtv.com saıtyna silteme jasap.
Sondaı-aq óńirlerdegi bos jumys oryndary týraly tolyq maǵlumat alýǵa bolady. Joba uıymdastyrýshylary ony aldaǵy bir-eki aı ishinde iske qosýdy josparlap otyr.
"Mobıldi qosymshanyń eń negizgi fıshkasy – Holand testi. Bul test adamnyń qandaı da bir kásipke beıimdiligin anyqtaýǵa arnalǵan. Iaǵnı sol arqyly talapker ózine jaqyn mamandyqty tańdaı alady. Tapsyrý tegin", - deıdi Qazaqstan stýdentter Alánsy Tóraǵasynyń birinshi orynbasary Amına Darıbekova.
Aıta ketý kerek, joba Aqparat jáne qoǵamdyq damý mınıstrliginiń granty negizinde júzege asty. Budan bólek 53 taqyryp boıynsha memlekettik granttar usynyldy. Olar túrli áleýmettik salalardaǵy adam quqyqtaryn, balalardy qorǵaý, genderlik teńdikti damytý, bilim berý, densaýlyq saqtaý, qorshaǵan orta, ulttyq birlikti ilgeriletý sıaqty 15 baǵytty qamtıdy.
"Azamattyq bastamalardy qoldaý ortalyǵy azamattyq belsendilikti jandandyrýda kóptegen sharalardy qolǵa alyp otyr. Granttardyń 30-y otbasy saıasatyn damytýǵa baǵyttalǵan. Shamamen 600 mlndaı teńge bólinip otyr", - deıdi Azamattyq bastamalardy qoldaý ortalyǵy Basqarma Tóraǵasynyń mindetin atqarýshy Ǵalym Qurman.