2022 jylǵy 1 tamyzda halyq sany 19 644 067 adamdy qurady.
Óńdelgen málimetterge sáıkes, 2021 jylǵy sanaqqa 19 186 015 adam qatysty. Osylaısha, 2009 jylǵy halyq sanaǵynan beri el halqy 20%-ǵa nemese 3,2 mln adamǵa ósti. Buǵan halyqtyń tabıǵı ósimi men Qazaqstan aýmaǵyna kóshi-qon aǵyny yqpal etti, dep habarlaıdy Almaty-akshamy.kz Inbusiness.kz silteme jasap.
Sanaq qorytyndysy boıynsha, qala turǵyndarynyń úlesi 61,2%-ǵa deıin ósti, aldyńǵy sanaq málimetterimen salystyrǵanda, ósim 5%-dy qurady. Tıisinshe, aýyl halqynyń úlesi 43,9%-dan 38,8%-ǵa deıin azaıdy.
Qala turǵyndarynyń basym bóligi Qaraǵandy oblysynda turady – turǵyndardyń 80%-y, ıaǵnı 1 mln-nan astam adam. Kerisinshe, qalalyqtar sany eń az aımaq – Túrkistan oblysy. Munda barlyǵy 498 myń adam nemese oblys turǵyndarynyń 24,3%-y qalalyq jerde turady.
«Ýrbanızasıa – ekonomıkanyń ındýstrıalandyrylýy men jumys kúshiniń ónimdi salalarǵa aýysýyna baılanysty bolatyn álemdik proses. Ádette, azamattar aýyldan qalaǵa bilim alý, mamandyǵy boıynsha jumys isteý jáne ál-aýqatyn jaqsartý úshin kóshedi. Sońǵy eki sanaq aralyǵyndaǵy kezeńde qala halqynyń eń kóp ósimi elimizdiń 6 óńirinde baıqaldy – Aqmola, Aqtóbe, BQO, SHQO, SQO, Qyzylorda oblystarynda. Al elorda halqy eki ese ósti», – deıdi QR SJRA Ulttyq statısıka búrosynyń basshysy Jandos Shaımardanov.
Aldyńǵy sanaq qorytyndysy boıynsha, Nur-Sultanda 619 myń adam turyp jatqan, 2021 jylǵy sanaq kezinde elimizdiń bas qalasyndaǵy halyq sany 1,23 mln adamdy qurady.
Qazaqstandaǵy áıelder sany burynǵydaı erler sanynan basym. Sanaq qorytyndysy boıynsha, olardyń sany jarty mıllıonǵa (536,3 myń adamǵa) artyq boldy.
Eger paıyzben aıtar bolsaq, erler úlesi – 48,6% (9 324 840 adam), áıelder úlesi – 51,4% (9 861 175 adam) qurady. Osylaısha, Qazaqstandaǵy 100 áıelge 99 er adamnan keledi.
Sanaq 10 jylda bir ret júrgiziledi jáne belgili bir kezeńdegi halyqtyń túrli áleýmettik-ekonomıkalyq parametrlerin kórsetedi. Jınalǵan derekter usynylǵan aqparattyń tolyqtyǵy (kóshi-qon, tabys, jumyspen qamtý, neke jaǵdaıy, týý, tilderdi meńgerý dárejesi, dinge qatynasy) men respondentterdiń qamtylýy boıynsha biregeı bolyp tabylady.
2021 jylǵy sanaq derekteri men Qazaqstan halqynyń sany boıynsha aǵymdaǵy derekterdi eskere otyryp júrgizilgen esepteýden keıin, 2022 jylǵy 1 tamyzdaǵy jaǵdaı boıynsha, elimizdiń halqynyń sany 19 644 067 adamdy qurady.
Sanaqtyń qysqartylǵan qorytyndylary óńirler boıynsha 2021 jylǵy derekterdi, ıaǵnı 3 oblys bólingenge deıingi statısıkany kórsetedi.