Úkimet iri qara men usaq maldy eksporttaýǵa kvota belgileýge sheshim qabylady
Premer-Mınıstrdiń orynbasary – Saýda jáne ıntegrasıa mınıstriniń m.a. Serik Jumanǵarınniń tóraǵalyǵymen syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komısıanyń (VAK) kezekti otyrysy ótti, dep habarlady Almaty-akshamy.kz Elorda.info-ǵa silteme jasap.
Munda astyq pen undy eksporttaýǵa shekteýlerdi alyp tastaý jáne iri qara men usaq maldy eksporttaýǵa kvota belgileý jóninde sheshimder qabyldandy.
VAK otyrysynda aıtylǵan Aýyl sharýashylyǵy mınıstrliginiń málimetinshe, Qazaqstanda dándi daqyldar jaqsy jınalady dep kútilýde. Bıyl 13 mln tonnadan astam bıdaı jınaý josparlanǵan, bul ótken jylǵy kórsetkishten 12%-ǵa artyq. İshki tutyný úshin shamamen 6,5 mln tonna qajet. Múddeli memlekettik organdardyń, «Atameken» QR UKP, Astyq odaǵy, Astyq óńdeýshiler odaǵy ókilderimen, «Shopan-Ata» ulttyq agro-qozǵalysynyń basshysymen bıdaı men meslındi, bıdaı unyn eksporttaýǵa sandyq shekteýlerdi (kvotalardy) alyp tastaýdyń oryndylyǵyn jan-jaqty talqylaý qorytyndysy boıynsha, sondaı-aq ASHM boljamy negizinde astyq pen un eksporttaýǵa shekteýlerdi 2022 jyldyń 10 qyrkúıeginen bastap alyp tastaý týraly sheshim qabyldandy. Eske sala keteıik, bul shekteý Aýyl sharýashylyǵy mınıstrliginiń buıryǵymen 2022 jylǵy 8 shilde men 30 qyrkúıek aralyǵyna engizilgen bolatyn.
Aýyl sharýashylyǵy mınıstrligine astyq eksportyna monıtorıń júrgizý jáne astyq pen un eksportyn odan ári retteý máselesin pysyqtaý tapsyryldy.
Sondaı-aq otyrys barysynda analyq mal basyn qospaǵanda, iri qara jáne usaq qara maldy eksporttaýǵa sandyq shekteý (kvotalar) belgileý maquldandy.
Statısıkaǵa súıensek, 2022 jylǵy 1 tamyzdaǵy jaǵdaı boıynsha, iri qara mal sany – 9,4 mln bas, onyń ishinde 4,5 mln sıyr, 3,2 mln tól bar.
Qoshqar eksporttaýǵa 60 myń bas nemese jalpy mal basynyń 9%-y, sondaı-aq 120 myń bas toqty nemese jalpy mal basynyń 10%-y mólsherinde kvota belgileý týraly sheshim qabyldandy.
2022 jylǵy 21 qańtar men 21 shilde aralyǵynda iri qara jáne usaq maldy eksporttaýǵa tyıym salynǵan bolatyn.