«Aıbyn» ásker jasyna deıingi jastar jıyny: qatysýshylar men kórermender úshin jańa múmkindikter
QR Qorǵanys mınıstrliginiń dereginshe, bıylǵy shara Qazaqstan Táýelsizdiginiń 30 jyldyǵyna arnalady jáne 6 qazan men 30 qarasha aralyǵynda onlaın rejıminde ótedi, dep habarlaıdy Almaty-akshamy.kz.
Jıynda 14 pen 18 jas aralyǵyndaǵy jastar áskerı-patrıottyq klýbtyń atynan da, jeke de saıysqa túse alady. Qatysý úshin AppStore jáne Play Market qosymshasyn smartfonǵa júkteý arqyly «Aıbyn» mobıldi qosymshasyna tirkelý qajet.
Barlyq jarystar men baıqaýlar qatysýshylardyń normatıvter men tapsyrmalardy oryndaý barysyndaǵy vıdeony mobıldi qosymshaǵa júkteý bazasynda uıymdastyrylady.
«Baıqaýlardyń barysyn ınternet-qoldanýshylary veb-saıt jáne «Aıbyn» mobıldi qosymshasy arqyly baqylaı alady. Bul jıyndy ótkizýdiń ashyqtyǵyn qamtamasyz etedi», - dedi Bas shtab bastyǵynyń orynbasary – tárbıe jáne ıdeologıalyq jumystar departamentiniń bastyǵy, general-maıor Serik Borambaev.
Bıyl jıyn baǵdarlamasynda jańa jarys túrleri engizildi: «Jas sarbaz – jas tilshi» atty jas tilshiler baıqaýy jáne toǵyzqumalaq ulttyq oıynynyń onlaın-týrnıri. Alǵash ret turaqty negizde «Jas Sarbaz Hab» kovorkıng-ortalyǵy iske qosylady. Bul rette ár senbi saıyn jıyn aıasynda sheberlik sabaqtary, trenıńter, tanymal adamdarmen kezdesýler ótkizý josparlanýda.
Jarystyń tujyrymdamasy, erejesi, reglamenti onlaın-platformada ornalastyrylǵan.
Jeńimpazdardy marapattaý men jıynnyń jabylý rásimi «Egemen eldiń erteńi – Men jas sarbaz» birinshi jas patrıottar forýmy aıasynda 30 qarashada ótedi. Oǵan júldeli oryndar ıelengen komandalardyń kapıtandary qatysady.
«Aıbyn» jıynynyń qatysýshylaryna arnalǵan qalǵan syılyqtar óńirlerge jetkiziledi jáne saltanatty rásimniń onlaın-translásıasy aıaqtalǵannan keıin garnızon basshylary jáne ardagerler tabystaıdy.
Aıta keteıik, «Aıbyn» áskerı-patrıottyq jıyny 2015 jyldan beri ótkizilip keledi. Osy ýaqyt ishinde de onyń tanymaldyǵy artyp, ózindik dástúrleri paıda boldy.