Ózbekstanda jasy 12-den asqan balalarǵa koronavırýsqa qarsy vaksına salýǵa ruqsat etildi, dep habarlaıdy almaty-akshamy.kz QazAqparatqa silteme jasap.
Vedomstvonyń habarlaýy boıynsha, Bas memlekettik sanıtarlyq dáriger men Ulttyq tehnıkalyq ımmýnologıalyq saraptama kelisimine sáıkes, ata-analary nemese qaraýshylary ruqsat etken jaǵdaıda, jasy 12-den asqan balalar Pfizer vaksınasyn erikti túrde saldyrta alady.
«12-15 jas aralyndaǵy balalarǵa ótkizilgen Pfizer vaksınasynyń klınıkalyq synamalary jaqsy nátıje kórsetti. Osyndaı keńesti Dúnıejúzilik densaýlyq saqtaý uıymy da berip otyr», - delingen Densaýlyq saqtaý mınıstrliginiń habarlamasynda.
Vedomstvonyń habarlaýynsha, qyrkúıektiń ortasynda elge Pfizer vaksınasynyń 1,2 mıllıon dozasy jetkizildi. Bul preparat Ózbekstanda paıdalanýǵa ruqsat etilgen besinshi vaksına bolyp otyr.
Eske sala keteıik, Ózbekstanda vaksına salý naýqany 1 sáýirden bastaý aldy. Vaksınalaý AstraZeneca, ZF-UZ-VAC2001, «Spýtnık-V», Moderna jáne Pfizer preparattarymen júzege asyrylady. Búginde respýblıkada 4 mıllıon adam tolyǵymen vaksına alǵan.