Satbayev University-diń qaýymdastyrylǵan profesory Inesh Kenjına atom energetıkasynyń búginde damyǵan elderdiń energetıkalyq qurylymynyń mańyzdy bóligi ekenin aıtady.
Álemniń 12 elinde AES-terden óndiriletin elektr energıasynyń úlesi 30%-dan assa, Fransıada bul kórsetkish 72%-dy quraıdy. Qazirgi zamanaýı AES-ter el ekonomıkasynyń ındýstrıaldyq damýy úshin bazalyq qýattyń senimdi kózi bolyp tabylady.
– Qazaqstanda atom elektr stansıasyn salý – eldiń energetıka salasyn ártaraptandyrýdyń perspektıvti baǵyty. Bul energıa generasıalaý kózderiniń qurylymyn turaqtyraq etedi jáne elimizdiń energıa resýrstaryn utymdy paıdalanýǵa múmkindik beredi, – dep atap ótti Inesh Kenjına.
AES tabıǵı resýrstardy tıimdi paıdalanýǵa múmkindik beredi
Qazaqstan ýran qory boıynsha álemdegi eń baı elderdiń biri bolyp tabylady, al «Qazatomónerkásip» UAK AQ tabıǵı ýrannyń álemdegi eń iri óndirýshisi jáne kóptegen memleketterge ýran jetkizip, álemdik atom energetıkasynyń 40%-dan astam qajettiligin qamtamasyz etedi. Osyǵan baılanysty Satbayev University qaýymdastyrylǵan profesory Inesh Kenjına elimizde atom energetıkasyn damytý qajettiligin atap ótti.
– Bul elektr energıasyn óndirý úshin ózimizdiń tabıǵı resýrstardy tıimdi paıdalanýǵa, kómirsýtekter men basqa da energıa resýrstarynyń ımportyna táýeldilikti azaıtýǵa múmkindik beredi, bul eldiń energetıkalyq qaýipsizdiginiń mańyzdy elementi bolyp tabylady. Sonymen qatar, Qazaqstan óz aımaqtyq energetıkalyq qaýipsizdigin nyǵaıtyp, kórshiles elderge elektr energıasyn eksporttaý áleýetin arttyra alady. AES munaı men gazben shektelmeı, energıa resýrstarynyń eksportyn ártaraptandyrýdyń mańyzdy elementi bola alady, – dep atap ótti sarapshy.