Ókiletti organdar bul salada tıisti jumystardy atqaryp jatyr.
İshki ister mınıstrligi Uıymdasqan qylmysqa qarsy kúres departamenti basshysynyń mindetin atqarýshy Qanat Nurmaǵambetov elimizde adam saýdasyna qatysty qandaı qylmystar anyqtalyp jatqanyn aıtty, dep habarlaıdy Almaty-akshamy.kz Egemen.kz cilteme jasap.
«Ókiletti organdar bul salada tıisti jumystardy atqaryp jatyr. Osy oraıda mınıstrlik júıeli túrde respýblıkalyq ári jedel aldyn alý is-sharalaryn ótkizip turady. Jalpy, jyl saıyn osy sanattaǵy 100-ge deıin sotqa deıingi tergeý tirkelip otyr», - dedi Qanat Nurmaǵambetov Ortalyq komýnıkasıalar qyzmetindegi dóńgelek ústel otyrysynda.
Onyń aıtýynsha, basqa elderge adamdardy zańsyz shyǵarýmen aınalysyp kelgen uıymdasqan toptardyń áreketterine tosqaýyl qoıylyp keledi.
«2021 jyldyń jeltoqsan aıynda transulttyq qylmystyq toptyń 17 múshesi túrli merzimge jazaǵa tartyldy. Olar adam saýdasymen aınalysqan jáne adamdardy Bahreın Koróldigine jetkizip otyrǵan», - dedi ol.
BUU málimetterine qaraǵanda, adam saýdasy boıynsha eń kóp taraǵan baǵyty aıasynda áıelder seksýaldy maqsatta paıdalaný úshin quldyqqa jegiledi. Osy oraıda adam trafıgine baılanysty jaǵdaılardyń 54 paıyzy atalǵan qylmysqa tıesili.
«Elimizde de adam saýdasynda áıelderdi seksýaldy maqsatta paıdalaný túri keńinen taraǵan. Al er adamdardy májbúrli túrde jumysqa salady. Sonymen qatar asyrap alý úshin náresteler men búldirshinderdi satý faktileri de anyqtalyp jatyr», - dedi Qanat Nurmaǵambetov.