Qazaqstanda 50-ge jýyq eski mamandyq boıynsha oqytý toqtatyldy jáne buryn-sońdy bolmaǵan 60-qa jýyq mamandyq ashylǵan.
Bul týraly Úkimet otyrysynda QR Bilim jáne ǵylym mınıstri Asqat Aımaǵambetov aıtyp berdi, dep habarlaıdy Almaty-akshamy.kz QazAqparatqa silteme jasap.
«Kadr daıarlaý boıynsha eń basty másele – berilgen bilimniń naryq talabyna sáıkes bolýy. Onyń basty sharty – akademıalyq derbestik. Munyń aldynda qandaı pánniń neshe saǵat oqytylatyny jáne olardyń mazmuny mınıstrlik arqyly, ıaǵnı memleket arqyly retteletin. Al naryq talaptary tez ózgerip otyrady, sondyqtan júıe eskirip, bilim berý baǵdarlamalary sáıkes kelmeıtin, jańa mamandyq ashý úshin 1-2 jyl ketetin boldy. Endi ýnıversıtetterge akademıalyq derbestik berilip, olar bilim berý baǵdarlamalaryn kásibı standarttarǵa sáıkes ázirleıdi. Iaǵnı, endi memleket emes, oqý orny jumys berýshilermen birlese otyryp, oqý baǵdarlamalaryn retteýge múmkindik aldy», - dedi Bilim mınıstri.
Onyń aıtýynsha, endigi problema – naryqqa qandaı daǵdylar qajettigin anyqtaıtyn kásibı standarttardyń jetispeıtininde. Kolejderge de akademıalyq derbestik berilip jatyr. Buǵan deıin stýdentter 2-4 jylǵa deıin uzaq oqıtyn, jumys berýshiniń talaptary eskerilmedi, mektepte oqyǵan pánder qaıtalanyp, bir ǵana biliktilik alyp shyǵatyn. Endi kolejderge kásiptik standarttar negizinde oqytý baǵdarlamasyn derbes ázirlep, oqý merzimderin ózderi aıqyndaı alady jáne túlek úsh biliktilikke deıin alyp shyǵady.
«Eskirgen mamandyqtar joıylyp, jańa mamandyqtar ashylyp jatyr. Mysaly, 50-ge jýyq eski mamandyq boıynsha biz oqytýdy toqtattyq jáne tıisinshe 60-qa jýyq buryn-sońdy oqytylmaǵan mamandyqtar ashylǵan. Sapany qamtamasyz etýdiń taǵy bir sharty – bilim berý baǵdarlamalaryn jańartý. Daıyn bolǵan kásibı standarttar boıynsha ýnıversıtetterde 4 myńnan astam baǵdarlama jańartyldy. Buryn bolmaǵan jasandy ıntellekt, IT-medısına, sıfrlyq zańger sıaqty 269 jańa baǵdarlama engizildi. Bular «Jańa bolashaq mamandyqtar atlasyna» sáıkes ashylyp otyr», - dedi Asqat Aımaǵambetov.
Aıta keteıik, kelesi oqý jyly úshin joǵary oqý oryndaryna 73 myń, kolejderge 31 myń grant bólinedi.