Injenerlik bilim men ǵylymdaǵy jańa tehnologıalardyń ǵylymı-zertteý haby qurylady. Bul týraly ǵylym jáne joǵary bilim mınıstrliginen málim etti, dep habarlaıdy almaty-akshamy.kz.
«2029 jylǵa deıingi Joǵary bilim men ǵylymdy damytý tujyrymdamasynda «Ýnıversıtet ǵylymy» bólimi kózdelgen. Onda negizgi nazar úsh negizgi baǵytqa shoǵyrlandyrylady: ǵylymı-tehnologıalyq jáne ınjınırıńtik parkter qurý; ýnıversıtetter men ǵylymı uıymdardy ıntegrasıalaý; endaýment-qorlardy qalyptastyrý. Birinshi baǵyt aıasynda ǵylymı-zertteý jáne tájirıbelik-konstrýktorlyq jumystarls iske asyratyn ǵylymı uıymdardy, JOO, kásiporyndardy transformasıalaý jolymen bes ǵylymı-óndiristik ortalyq qurylady. Q.Sátbaev atyndaǵy Qazaq ulttyq tehnıkalyq zertteý ýnıversıtetiniń damý baǵdarlamasy aıasynda ınjenerlik bilim men ǵylymdaǵy jańa tehnologıalardyń ǵylymı-zertteý haby qurylatyn bolady. Memleket basshysynyń QR Ulttyq ǵylym akademıasynyń mereıtoılyq sesıasynda bergen tapsyrmasy aıasynda ǵylymı zerthanalar men tájirıbelik-synaq ınfraqurylymyn damytýǵa maqsatty granttar bóle otyryp, ýnıversıtetter janyndaǵy ǵylymı-tehnologıalyq parkterdi qoldaý baǵdarlamasy ázirlenip, iske asyrylady. Baǵdarlamalyq-nysanaly qarjylandyrý aıasynda konstrýktorlyq búrolardyń, ınjınırıńtik ortalyqtardyń, bıznes-ınkýbatorlardyń, ınovasıalyq ortalyqtardyń, tehnologıalardy komersıalandyrý men transfertteýdiń óńirlik ortalyqtarynyń, jobalyq konstrýktorlyq búrolardyń jáne ınfraqurylymnyń basqa da elementteriniń jumys isteýi úshin ýnıversıtetter janyndaǵy ǵylymı-tehnologıalyq parkter men ınjınırıńtik ortalyqtarǵa qoldaý kórsetý máseleleri pysyqtalýda», - dep atap ótti mınıstrlikten agenttiktiń resmı saýalyna oraı.
Vedomstvo málimetinshe, ekinshi baǵyt boıynsha ǴZI men ýnıversıtetterdiń jetekshi álemdik ǵylymı ortalyqtarmen áriptestigin nyǵaıtý arqyly otandyq ǵylymdy halyqaralyq ǵylymı keńistikke ıntegrasıalaý kúsheıtiledi. Jetekshi ǵylymı-zertteý ınstıtýttary men ortalyqtarynda doktoranttar men magıstranttardyń taǵylymdamadan ótý tájirıbesi de keńeıýde. Dısertasıalyq keńesterge ǴZI ǵalymdary qatysady.
«Úshinshi baǵytty iske asyrý elimizde ýnıversıtetter janyndaǵy endaýment-qorlar mádenıetin qalyptastyrýǵa baǵyttalǵan. Ol úshin endaýment-qorlardy retteý jónindegi Zań jobasynyń tujyrymdamasy ázirlendi. Endaýment-qorlarǵa jáne olardy basqarýǵa qaıyrymdylyq jasaý úshin salyqtyq yntalandyrýdy engizý boıynsha usynystar ázirlendi. Joǵaryda atalǵan úsh baǵyt boıynsha is-sharalardy tabysty iske asyrý Scimago reıtıńinde qazaqstandyq ǴZI men joǵary oqý oryndarynyń sanyn arttyrýǵa yqpal etetin bolady», - dedi mınıstrlikten.