Temirjol vokzaldary magıstraldyń mańyzdy bóligi jáne kólikpen tasymaldaý toraptary bola otyryp, ártúrli kólik túrleriniń ózara baılanysyn qamtamasyz etedi.
Vokzaldar qyzmeti qaýipsizdik, jolaýshylar úshin qolaıly jaǵdaı jasap, servıs qurý jáne qoljetimdi kólik aǵynyn qamtamasyz etý múmkindikterimen baılanysty. Áleýmettik mańyzy bar nysandar aptanyń jeti kúni 24 saǵat jumys isteıdi, dep habarlaıdy aqshamnews.kz rail-news.kz-ke silteme jasap.
«QTJ» UK» AQ Magıstraldyq jeli dıreksıasy fılıalynyń vokzal sharýashylyǵy jónindegi atqarýshy dırektory Juban Kórpebaevtyń aıtýynsha, búginde Qazaqstanda 301 vokzal bar. Al kún saıyn Qazaqstan temir joldarymen 139 jup jolaýshylar poıyzy ótedi. 59 vokzal klastarǵa jikteledi jáne tıisinshe qaýipsizdikti, onyń ishinde terorızmge qarsy qaýipsizdikti qamtamasyz etý boıynsha talaptarǵa saı keledi.
– Máselen, birinshi klasty jáne klastan tys 14 vokzal bar. Ekinshi-úshinshi klasty vokzaldarda zańnamaǵa sáıkes tekserý rásimderi júrgizilmeıdi. Alaıda, bul vokzaldar beınebaqylaý, órt dabyly júıelerimen jaraqtandyrylǵan. Jalpy, bıyl qazan aıyndaǵy jaǵdaı boıynsha tekserý qyzmetteri 200-den astam tyıym salynǵan zattardy alyp ótý áreketin anyqtady. Degenmen mundaı jaǵdaılardyń tómendeý úrdisi baıqalady, – dep atap ótti ol.
Kórpebaevtyń aıtýynsha, kompanıa QR İİM-men birlesip, tıisti algorıtmderi bar «Aqyldy kameralardy» ornatý máselesin pysyqtaýda, mysaly bir jerde birneshe adamnyń jınalýy, ıesiz qalǵan zattar jáne t. b. Búginde bul joba iri vokzaldarda pılottyq rejımde iske asyrylýda. Sonymen qatar búgingi tańda 7 vokzal ákimdikterdiń qaramaǵynda, olar – Almaty-1, Almaty-2, Shymkent, Túrkistan, Pavlodar, Ekibastuz jáne Aqsý vokzaldary. Bul rette jolaýshylardy qabyldaý jáne jóneltý, vokzal boıynsha kezekshiler, anyqtamalyq qyzmetterdiń jumysy «QTJ» UK» AQ-ǵa jatady. Osy obektilerdiń ǵımarattaryn kútip ustaý jáne paıdalaný jaýapkershiligi qala ákimdikteriniń quzyrynda.
Sondaı-aq kompanıa búginde saýda alańdaryn jeke pavılondarǵa bólý máselesin qarastyrýda. Jaqyn bolashaqqa josparlanǵan jumystar qatarynda Astana-1 vokzalyn kúrdeli jóndeý, Shý vokzalynda da birqatar jumystar júrgizý bar. Qysqasy, salanyń áleýmettik obektileri bolyp sanalatyn, sondaı-aq negizgi strategıalyq ról atqaratyn temirjol vokzaldarynyń damýyna únemi nazar aýdarylyp, onyń qyzmeti basty nazarda bolady.