Almaty ákimi Erbolat Dosaev jańa standart boıynsha abattandyrylǵan aýlalarmen tanysty
Áýezov aýdanyna jumys sapary barysynda Almaty ákimi Erbolat Dosaev «Halyq qatysatyn búdjet» baǵdarlamasy aıasynda kóriktendirilgen aýla aýmaǵyn kórdi, dep habarlaıdy aqshamnews.kz
Almatyda aýlalardy aýqymdy jańartý jumystary Memleket basshysynyń jaıly ári qaýipsiz ómir súrý jaǵdaı jasaý jónindegi tapsyrmasyna sáıkes júzege asyrylýda. Áýezov aýdanynda 966 aýla bar, olardyń 500-i aǵymdaǵy jáne kúrdeli jóndeýdi qajet etedi. Byltyr Áýezov aýdanynda 174-ten astam aýlada jóndeý jumystary júrgizildi. Bıyl 23 aýlaǵa kúrdeli jóndeý jasalsa, taǵy 137 aýlaǵa jobalaý-smetalyq qujattama ázirlenýde.
Aýlalardy abattandyrý sonymen qatar «Halyq qatysatyn búdjet» baǵdarlamasy aıasynda júrgiziledi. Bıyl Áýezov aýdanynda 57 joba júzege asyrylady, onyń ishinde 41 aýlany abattandyrý qarastyrylǵan, solardyń biri – №2 shaǵyn aýdandaǵy 41 jáne 42 úıler arasyndaǵy aýla.
Aýla aýmaǵy «AlmatyBasJospar» ǵylymı-zertteý ınstıtýtynyń ádistemelik nusqaýlyǵyna sáıkes kúrdeli jóndeýden ótti. Onda árbir aýlany kóriktendirýdiń standarty men ózindik ereksheligi eskerilgen. Aýlada balalar jáne sport alańdary salyndy, 19 kóshe jaryqtandyrý baǵanasy, 12 beınebaqylaý kamerasy ornatyldy, 390 sharshy metrlik fýtbol alańy salyndy, 300 metrlik jasyl qorshaý jáne 50 aǵash otyrǵyzyldy. Sonymen qatar, 3 myń sharshy metrden asatyn jasyl aımaqqa avtosýarý júıesi men 400 metrlik trotýar ornatyldy.
«Jańartylǵan aýlamyz bizge óte unaıdy – balalarmen serýendeıtin analar úshin óte qolaıly, bizge tipti basqa aýlalardyń turǵyndary kelip, ýaqytyn osynda ótkizedi. Burynǵy kúıimen salystyrǵanda aıyrmashylyq úlken – Eýropa bizge kelgendeı! Biz aýlamyzdyń abattandyrý jumystaryna belsene qatysyp, ony qolaıly etý úshin usynys bildirdik. Pikirlerimizdi eskergenderińizge rahmet!», – dep turǵyndar Almaty ákimine alǵys bildirdi.
Qala basshysy halyq tyǵyz ornalasqan jáne kópqabatty úıler kóp shoǵyrlanǵan Áýezov aýdanynda aýlalardy abattandyrý jáne jańartý basty mindet ekenin atap ótti. Erbolat Dosaevtyń aıtýynsha, abattandyrý jańa standart boıynsha júrgizilýde, munda sapa men qaýipsizdik talaptary eskerilgen – beınebaqylaý, jaryqtandyrý, avtosýarǵyshpen jabdyqtalǵan kógaldandyrý júıeleri ornatylady. Osylaısha, qala turǵyndaryna jaıly jaǵdaılar jasalýda.