Qazaqstanda egin jınaý naýqany aıaqtaldy: 26,5 mln tonna astyq jınaldy, ónimdilik ótken jylǵy deńgeıden asty
2024 jyly Qazaqstanda aýyl sharýashylyǵy daqyldaryn jınaý naýqany tabysty aıaqtaldy. Jalpy jınaý alańy 23,3 mln gektardy qurap, onyń 16,7 mln gektary dándi jáne burshaqty daqyldar boldy. Nátıjesinde 26,5 mln tonna astyq jınaldy, dep habarlaıdy aqshamnews.
Ortasha ónimdilik gektaryna 16 sentnerdi qurady, bul ótken jylǵy kórsetkishterden aıtarlyqtaı joǵary. Negizgi astyq egetin óńirlerdiń arasynda Soltústik Qazaqstan oblysynda ónimdilik 18,6 sentnerge jetip, joǵary kórsetkish kórsetti. Sondaı-aq, Qyzylorda, Túrkistan jáne Jetisý oblystarynda da ónimdilik aıtarlyqtaı joǵary boldy.
Aýyl sharýashylyǵy mınıstri Aıdarbek Saparov Úkimet otyrysynda kúzgi aýa raıynyń qolaıly jaǵdaılary egin jınaý naýqanyn der kezinde ári shyǵynsyz júrgizýge múmkindik bergenin atap ótti. Mınıstrdiń aıtýynsha, joǵary ónimdilikke agrotehnologıalardy durys paıdalaný, sapaly tuqymdardy qoldaný, mıneraldy tyńaıtqyshtardy qoldaný jáne ósimdikterdi tıimdi qorǵaý sıaqty sharalar yqpal etti.
Dándi daqyldardy jınaý aıaqtaldy, alaıda júgeri dánin jınaý jumystary jalǵasýda.