Geologıalyq barlaýdaǵy JI tehnologıalary: Qazaqstanda 2,5 mln geologıalyq aqparat sıfrlyq formatqa aýystyryldy, dep habarlaıdy aqshamnews.kz
Úkimet otyrysynda geologıalyq salany damytý máselesi qaralyp, Premer-mınıstr Oljas Bektenov geologıalyq barlaýǵa ınvestısıalar tartý jáne salanyń bolashaǵyn taldaýǵa múmkindik beretin sıfrlyq tehnologıalardy engizýdiń mańyzdylyǵyn atap ótti.
Ónerkásip jáne qurylys mınıstri Qanat Sharlapaev bastapqy geologıalyq aqparatty sıfrlandyrý jumystarynyń barysyn baıandady. Búgingi tańda 2,5 mln derek sıfrlyq formatqa aýystyryldy. Bul jumys jasandy ıntellekt (JI) tehnologıalaryn qoldaný arqyly jetildiriledi. 2024 jyldyń sońyna deıin taǵy 1,5 mln derekti sıfrlandyrý josparlanǵan. Jalpy proses 2026 jyldyń sońyna deıin aıaqtalady dep kútilýde.
Zerttelgen jer qoınaýynyń aýdany 2 mln m²-ge deıin ulǵaıtyldy. Shyǵys Qazaqstanda mıneraldyq resýrstardyń perspektıvaly ken oryndaryn sheteldik geologıalyq qyzmettermen birlesip izdestirý jumystary júrgizilýde.
Kómirsýtek shıkizaty salasynda kúrdeli ken oryndaryn barlaýǵa ınvestısıalar tartý úshin Jaqsartylǵan modeldik kelisimshart tetigi engizildi. 12 ýchaskede izdestirý jumystary aıaqtalýǵa jaqyn. Ásirese lıtııge degen suranys joǵary. Lıtıı izdestirý Baıankól óńirinde jáne Aral–Kaspıı aýmaǵynda júrgizilip jatyr.
Bıyl shamamen 1 mln sharshy shaqyrym aýmaqta paıdaly qatty qazbalardy barlaý alańdary ashyldy. Bul Riotinto, Fortescue, Arras Minerals sıaqty iri halyqaralyq kompanıalardy tartýǵa múmkindik berdi.
Degenmen, qatty paıdaly qazbalar men kómirsýtek qorlaryn keńeıtý boıynsha izdestirý jumystarynyń belsendiligi tómen ekeni atap ótildi.
«Qolda bar jumys tásilderin ózgertý kerek. Mıneraldyq-shıkizat bazasyn tıimdi paıdalanyp, jańa ken oryndaryn ıgerý boıynsha naqty memlekettik saıasat ázirleý qajet. Paıdaly qazbalardyń sapalyq quramy tómendep barady. Bul salaǵa ınvestısıa tartý úshin jeńildikter qarastyrý kerek», — dedi Premer-mınıstr7