QR Premer-Mınıstriniń orynbasary Tamara Dúısenovanyń tóraǵalyǵymen ótken keńeste balalardyń jazǵy demalysyn uıymdastyrý máseleleri qaraldy. Oǵan múddeli memlekettik organdardyń ókilderi men oblys ákimderiniń orynbasarlary qatysty.
Jazǵy lagerlerdiń jumysy týraly oqý-aǵartý vıse-mınıstri Edil Ospan baıandady. Demalys maýsymy bastalǵaly beri elimizde túrli formadaǵy 10 208 lagerde 1,7 mln-nan asa bala qamtylyp otyr, dep habarlaıdy Almaty-akshamy.kz.
Belsendi jazǵy demalys uıymdastyrýda balalardyń qaýipsizdigine erekshe mán berilip otyr. Oqýshylardy saýyqtyrý nysandaryna jibermes buryn sanıtarlyq-epıdemıologıalyq qyzmet mamandary jiti tekserý júrgizgen. Densaýlyq saqtaý vıse-mınıstri Aıjan Esmaǵambetova lagerlerdiń sanıtarlyq jaǵdaıy turaqty baqylaýda ekenin jetkizdi.
Aıta keteıik, balalardyń jazǵy demalysyn uıymdastyrý boıynsha óńirlerde taqyryptyq josparlar qurylǵan. Onyń aıasynda lagerlerdegi baǵdarlamalardan bólek, tanymdyq sharalar da qarastyrylǵan bolatyn. Osy rette balalardy tasymaldaý kezindegi qaýipsizdik máselesi týyndaıdy. Osyǵan baılanysty ishki ister mınıstriniń orynbasary Igor Lepeha buǵan qatysty aqparatty polısıa bólimderine aldyn ala habarlaý qajettigin eske saldy. Mundaı jaǵdaıda patrúldik mashınalar birge shyǵyp, joldaǵy qaýipsizdikti qamtamasyz etetin bolady.
«Balalardyń jazǵy belsendi demalysy máselesi turaqty baqylaýda bolýy qajet. Demalys kezeńi meıilinshe paıdaly ótýi úshin oqýshylarǵa barlyq jaǵdaı jasalýy kerek. Bul rette múddeli memlekettik organdardyń birlese qyzmet atqarýy mańyzdy. Atalǵan jumysty úılestirý Oqý-aǵartý mınıstrliginiń qolynda», — dep atap ótti Tamara Dúısenova.