Almatyda Halyk qaıyrymdylyq qorynyń qoldaýymen aýyl sportyn damytýǵa arnalǵan AUYLSPORT jobasynyń tanystyrylymy ótti, dep habarlaıdy aqshamnews.kz.
Sharada AUYLSPORT jobasynyń aýyldyq aımaqtardaǵy buqaralyq sportty damytýdaǵy róli men mańyzy, aldaǵy josparlar jáne óńirlerde ótetin sporttyq is-sharalar týraly tolyq aqparat usynyldy. Jobany Halyk qaıyrymdylyq qorynyń Almaty oblysy boıynsha fılıalynyń dırektory Jaqsylyqov Ǵalymbek Jaqsylyquly tanystyrdy.
Tanystyrylymǵa elimizdiń sport salasyndaǵy maqtanyshtary, tanymal sportshylar, Olımpıada chempıony Ermahan Ibraımov pen jıý-jıtsýdan segiz dúrkin álem chempıony Jibek Qulymbetova jáne ózge de sportshylar qatysty.
AUYLSPORT jobasynyń negizgi maqsaty:
Aýyldyq balalar men jasóspirimderdi sportqa tartý;
Sportty nasıhattaý jáne buqaralyq sportty damytý;
Aýyldaǵy jattyqtyrýshylardyń biliktiligin arttyrý jáne jańa daǵdylardy úıretý."Eldegi sport salasyndaǵy jetistikterdi, kórsetkishterdi olımpıada oıyndarymen baılanystyratynymyz jasyryn emes. Olımpıada júldegerleriniń basym kópshiligi aýyldan shyqqan sportshylar eken. "Halyq" qaıyrymdylyq qory AýylFýtbol jobasyn qoldaý barysynda kezdesken máselelerdi nazarǵa ala otyryp jáne aýyldyq eldi mekenderde fýtbol ǵana emes basqa da sport túrlerin damytýǵa úles qosý úshin #AýylSport jobasyn qolǵa aldy. Joba aıasynda elimizdiń barlyq óńirinen 6 sport túri boıynsha 12 myńǵa jýyq aýyl balasyn qamtý kózdelýde", - dep atap ótti sharada "Halyq" qaıyrymdylyq qorynyń Almaty oblysy boıynsha fılıalynyń dırektory Ǵalymbek Jaqsylyqov.
Boks, kúres jáne karate sporty boıynsha aımaqtyq týrnırler 4 salmaq dárejesi boıynsha (40 kg deıin, 40-50 kg, 50-55 kg, 55 kg jáne joǵary), basketbol jáne voleıbol 2 jas aralyǵy boıynsha qyzdar jáne uldar (10-14 jas aralyǵy jáne 14-17 jas aralyǵy), shahmattan 4 jas aralyǵy boıynsha (6-8, 8-12, 12-14, 14-ten joǵary) júrgiziledi.
Óńirlik lıganyń jeńimpazdary sporttyq forma jáne jattyǵý quraldarymen qamtamasyz etiledi. Respýblıkalyq qorytyndy lıganyń jeńimpaz sportshylary men komandalaryna arnaıy oryndarda oqý-jattyǵý jıyny uıymdastyrylady.
Aıta keteıik, bul joba Halyk qaıyrymdylyq qorynyń elimizdiń túkpir-túkpirindegi muqtaj jandardy qoldaýǵa jáne halyqtyń ómir súrý jaǵdaıyn jaqsartýǵa baǵyttalǵan jobalarynyń biri. Qor aýyldaǵy sportty damytýǵa osyǵan deıin 500 mıllıonǵa jýyq qarjy bóldi.
Sondaı-aq, 2016 jyly Tımýr Qulybaevtyń jetekshiligimen qurylǵan Halyk qory, osyǵan deıin 120-dan astam áleýmettik jobany júzege asyryp, 85 mıllıard teńgege kómek kórsetti.