Onda qant qyzylshasyn ósiretin óńirlerdegi dıqandardyń usynystary eskeriledi.
Qazaqstan Úkimeti qant óndirisin tıimdi damytýdy qolǵa almaq. Osy maqsatta Aýyl sharýashylyǵy mınıstri Erbol Qarashókeev Almaty oblysyndaǵy dıqandarmen kezdesti, dep habarlaıdy Almaty-akshamy.kz.
«Mınıstr óńirdegi agroónerkásiptik keshendi damytýdyń qazirgi jaǵdaıymen, atap aıtqanda, qant óndirisiniń búgingi ahýalymen tanysty. Kezdesý barysynda vedomstvo basshysy aýyl sharýashylyǵy taýar óndirýshilerine kórsetiletin memlekettik qoldaý sharalary týraly baıandap, salany tıimdi damytý úshin Qant óndirý tujyrymdamasy daıyndalǵanyn aıtty. Onda qant qyzylshasyn ósiretin óńirlerdegi dıqandardyń usynystary eskeriledi»,- delingen Almaty oblysy ákiminiń baspasóz qyzmetiniń habarlamasynda.
Oblystyq aýyl sharýashylyǵy basqarmasynyń basshysy Qanat Esbolatovtyń aıtýynsha, jyl sońynda óńirdegi AÓK jalpy ónimi 1060,7 mlrd teńge bolady dep kútilýde, ósim deńgeıi - 1,5%. Bul rette egistik kólemi 974 myń gektardan asty, sonyń ishinde qant qyzylshasy – 6,2 myń ga. Qant qyzylshasyn damytý josparyna sáıkes, tátti túbirdiń alańy jyl saıyn ulǵaıtylyp, 2025 jylǵa qaraı 11,2 myń ga bolady. Qant óndirisiniń kólemi 175 myń tonna, eldiń qantqa degen suranysyn 35% jabady. Qant qyzylshadan da, qamystan da óńdeletin bolady.
Eske salsaq, ótken jyldan beri Kóksý qant zaýyty qamys qantyn óndiretin jelini iske qosqan bolatyn. Bıylǵy jyldan bastap Aqsý qant zaýyty da qamys qantyn shyǵarýǵa kirispek. Bul kásiporyn jergilikti jerdiń óńdeletin shıkizaty qajetti kólemge jetkenshe 2025 jylǵa deıin tek osy daqylǵa mamandanatyn bolady. Osy maqsatta bolashaqta kásiporynǵa jergilikti dıqandarmen qatar tátti túbir ósirýge jer ýchaskesin berý josparlanyp otyr. Ázirge Kóksý qant zaýytynyń basshylyǵy shalǵaı aýdandardan kásiporynǵa jetkiziletin shıkizattyń tasymaly úshin sharýashylyqtardy sýbsıdıalaıtyn bolady. Búgingi kúni Aqsý qant zaýytynyń óńdeý qýaty 550 myń tonna. Onyń qaıta jańǵyrtýǵa 14,5 mlrd. teńge ınvestısıa tartyldy, al Kóksý qant zaýytynyń jobalyq qýaty – 250 myń tonna, oǵan ınvestordyń 4,5 mlrd teńge jeke qarajaty quıylǵan.
Qant strategıalyq mańyzdy ónim ekenin eskere otyryp, memleket dıqandarǵa qajetti qoldaý jalǵastyrmaq. Aýyl sharýashylyǵy mınıstri Erbol Qarashókeev oblystyń qyzylsha egetin sharýa qojalyqtary ókilderimen áńgimelesýi barysynda Premer-Mınıstrdiń tapsyrmasy boıynsha Qant óndirý tujyrymdamasy daıyndalatynyn aıtty, sonyń ishinde qant qyzylshasy da qarastyrylady.
«Bıylǵy jyly AÓK damytýǵa 309 mlrd teńge sýbsıdıa baǵyttalady. Qosymsha qarjy bólý qarastyrylyp jatyr. Qazir bizge qant óndirisin damytýǵa ne kedergi bolyp turǵanyn anyqtaý kerek. Aýyspaly egisti, sý resýrstaryn, zamanaýı agrotehnologıany damytý men engizýdi esepke ala otyryp alqapty keńeıtýdiń naqty kórsetkishterin esepteýimiz qajet. Ol úshin barlyq baǵytta júıeli jumys istep, salany damytýdy qolǵa alýymyz kerek. Osy saparymnyń nátıjesi retinde sizderdiń usynystaryńyz Qant óndirý tujyrymdamasyn daıyndaý barysynda eskeriletin bolady», - dedi mınıstr.