Elde qaǵaz defısıti de baıqalyp otyr
Keńse jumysshylarynyń aıtýynsha, qazir keńse taýarlary dúkenderinde qaǵazdy shekteýli mólsherde satyp jatyr. Cebebi baǵasy shamamen 2 ese ósken, dep habarlaıdy Almaty-akshamy.kz Khabar.kz-ke silteme jasap.
Grıgorıı Kolonyń elordadaǵy polıgrafıalyq ortalyǵyna kúnine 100-ge jýyq adam qaǵaz basyp shyǵarýǵa keledi. Sáıkesinshe, oǵan býma-býma qaǵaz jumsalady. Sońǵy ýaqytta naryqta bul taýardyń da quny sharyqtap, defısıt baıqala bastapty.
«Taýar jetkizýshiler bizge aldyn ala eskertip, defısıt bolatynyn aıtqan: Bir vagon qaǵaz bar. Kelesi partıa qashan keletini belgisiz. Sondyqtan qazir alyp alyńdar degen», - deıdi polıgrafıalyq ortalyqtyń quryltaıshysy Grıgorıı Kolo.
Grıgorııdiń aıtýynsha, buryn qaǵazdyń 500 býmasyn satyp alýǵa bolatyn. Al qazir tek aptasyna bir ret 20 býma ǵana saýdalanady. Bul úlken polıgrafıa ortalyqtary úshin jetkiliksiz.
«Bizge keletin qaǵazdyń barlyǵy reseılik. Kórshi elde onyń óndirisi toqtaǵan joq. Másele aǵartqyshta bolyp tur. Qaǵazdyń bastapqy túsi sur bolady. Ony aǵartý úshin tıisti hımıkattar paıdalanylady. Al ol Germanıa men Fınlándıadan ákelinedi. Endi batystyń Reseıge salǵan sanksıalary saldarynan aǵartqyshtar dittegen jerine jetpeı otyr. Saldarynan qaǵaz tapshylyǵy sezilýde», - deıdi polıgrafıalyq ortalyqtyń quryltaıshysy Grıgorıı Kolo.
Qazir keńse taýarlary dúkenderinde qaǵazdyń baǵasy san alýan qubylyp tur. Ádette 1,5 myń teńge tóńireginde turatyn 1 býmasy qazir 3 myń teńgeden kem emes. Sapasyna qaraı baǵasy da joǵarylaı beredi.
Úlken kólemdegi keńse qaǵazdaryn kesetin Shymkenttegi zaýyttyń jylyna A-4 format qaǵazdyń 3 mln, A-3 paraqtyń 300 myń býmasyn shyǵaratyn qaýqary bar. Biraq qazir óndiris oshaǵy shıkizattyń joqtyǵynan turalap tur.
«Bizdiń shıkizat Reseı men Fınlándıadan keledi. Biraq biz kóbine Fınlándıadan aldyryp, osy jerde óńdep, Qazaqstan ishinde satatynbyz. Óndirýshiler ár kásiporyn 1 vagon sata alady dep shekteý qoıyp qoıǵan. Bir vagon degenimiz 24-25 myń dana qaǵaz ǵana. Ol 1% de qamtamasyz etpeıdi. Bizdiń qýattylyǵymyz aıyna 10 vagonǵa deıin óndirýge jetedi», - dnıdi kásiporyn dırektorynyń orynbasary Qanat Álimbaev.
Elimizde orman kóp bolmaǵandyqtan, elimiz qaǵazdy ózge elderden satyp alýǵa májbúr bolyp otyr. Negizgi ımporttaýshy memleket – Reseı Federasıasy.
«Meniń oıymsha, Qazaqstanda taýar tapshylyǵy qatty baıqalmaıdy. Óıtkeni bizge Reseıden bólek Qytaı men Túrkıa elderinen de qaǵaz ákelinedi. Sondyqtan álternatıvti marshrýttar bar. Al baǵaǵa keler bolsam, qaǵaz quny negizsiz kóterildi me álde joq pa, ony tekseretin tıisti mekemeler bar. Biraq qaǵaz baǵasynyń nege qubylyp turǵanyn bilmeımin. Eger keńse taýarlaryn satatyn dúkender bir-birimen kelisip, baǵany ósirse, onda tıisti mekemeler naqty sharalar qoldanady», - dedi QR Indýstrıa jáne ınfraqurylymdyq damý mınıstri Qaıyrbek Óskenbaev.
Jalpy, mamandardyń aıtýynsha, qazir Reseı qaǵazdy aǵartý isin óz zaýyttarynda jandandyryp jatyr. Sondyqtan elimizdiń qaǵaz naryǵyndaǵy jaǵdaı 1-2 aı tóńireginde turaqtalady dep topshylaýda.