Elimizdiń barlyq ónerkásip salalary, onyń ishinde TKMK da memleketten qandaı da bir preferensıalar alady.
Óz kezeginde Úkimet olardy otandyq ónimdi satyp alý kólemin ulǵaıtý arqyly óńirlerde shaǵyn jáne orta kásipkerliktiń ósýin yntalandyrýǵa shaqyrady, dep habarlaıdy Almaty-akshamy.kz.
Birinshi vıse-premer Roman Sklárdyń aıtýynsha, bul jumysty Qazindustry ınstıtýty kúndelikti júrgizedi. Bul rette iri jáne orta kompanıalar tarapynan tolyq túsinik qalyptasqan.
«Premer-Mınıstrdiń iri kompanıalardyń aldyna qoıǵan taǵy bir mindeti – qaıta bólinýi joǵary óndiristerdi damytý. Esterińizge sala keteıin, buǵan deıin bizdegi barlyq alúmını eksportqa shyǵarylatyn. Tipten, alúmını satyp alǵysy kelgen qazaqstandyq kompanıalar ony kórshi elden satyp alǵan kezder de bolǵan. Bastapqyda senimge kirý arqyly, keıinnen qajetti normatıvtik-quqyqtyq aktilerdi qabyldaı otyryp, biz ózimizdiń qaıta óńdeýshilerimiz úshin ishki baǵanyń London bırjasynan 5%-ǵa tómendeýine qol jetkizdik. Ótken jyly 51 myń tonna alúmını el ishinde qaıta óńdeldi. Bul baǵytty biz ári qaraı jalǵastyramyz. Barlyq normatıvtik-quqyqtyq aktiler bar, iri kompanıalar óz shıkizatyn az jeńildikpen beredi, óndiristi uıymdastyrý úshin jaǵdaıdy jaqsartýǵa múmkindik beredi jáne tabysty arttyrady. Shıkizat naryǵyndaǵy qazirgi jaǵdaıdy eskersek, bul kompanıalardyń ózderine de tıimdi. Olar, árıne, salystyrmaly túrde tómen paıyzben, qymbat emes uzaqmerzimdi nesıeler suraıdy. Múmkindiginshe bul máselelerdi de sheshemiz», — dedi Roman Sklár.