Memlekettik rámizder kúnine oraı konferensıa ótti
Áleýmettik qyzmetter úıinde QR Memlekettik rámizderi kúnin merekeleý sheńberinde qoǵam qaıratkerleriniń, tarıhshylardyń, sarapshylardyń, úkimettik emes uıymdar ókilderiniń jáne jastardyń qatysýymen «Kók týdyń jelbiregeni» taqyryby aıasynda konferensıa uıymdastyryldy.
İs-shara Almaty qalasy Qoǵamdyq damý basqarmasynyń qoldaýymen ótkizildi. İs-sharanyń basty maqsaty – óskeleń urpaqtyń boıynda patrıottyq sezimdi tárbıeleý, memlekettik rámizderdi nasıhattaý, azamattardyń óz eliniń salt-dástúrlerine, tarıhy men mádenıetine degen qyzyǵýshylyǵy men qurmetin saqtaý.
Memlekettik rámizder – bul kez kelgen memlekettiń egemendigi men birtutastyǵyn beıneleıtin, onyń ajyraǵysyz atrıbýttarynyń biri. Memlekettik tý, Memlekettik eltańba jáne Memlekettik gımn Qazaqstan Respýblıkasynyń memlekettik rámizderi bolyp tabylady.
«Qazaqstan Respýblıkasynyń memlekettik rámizderi týraly» Konstıtýsıalyq zań 2007 jyly 4 maýsymda qabyldandy. Osy Zańǵa sáıkes jyl saıyn 4 maýsym Qazaqstan Respýblıkasynda Memlekettik rámizder kúni bolyp merekelenip keledi.
«Elimizdiń tarıhynda Memlekettik rámizder qoǵamdyq saıası mádenıettiń bir bóligi bola otyryp, ár ýaqytta birlikke shaqyrýdyń, ulttyq maqtanysh pen patrıottyq sezimdi qalyptastyrýdyń mańyzdy quraly retinde qyzmet atqaryp keledi. Jas azamattarymyzdy patrıottyq tárbıege, qoǵamnyń rýhanı birligin qýattandyratyn qundylyqtarǵa baýlıtyn negizgi qural – Memlekettik rámizderimizdiń máıeginde jatyr. Osynyń arqasynda memleketimiz egemendigin alyp, tórtkúl dúnıege terezesi teń múshe bolyp qosylǵan kezden bergi Jas tolqyn býyny Otanyna, Memlekettik rámizderine degen shynaıy, pák syı-qurmetti tula boıyna tereń sińirýde», - dedi Almaty qalasy Qoǵamdyq damý basqarmasynyń basshysy Aıdar Esenbekov.
Sonymen qatar patrıottyqttyń eren úlgisin kórsetý, rámizderdiń mán-mańyzy týraly birqatar oılar aıtyldy.
«Memlekettik rámizder memlekettiń belgisi. Jas urpaqtyń patrıottyq sezimin arttyrý mańyzdy. Biz jastar arasynda, babalarymyzdyń ótken tarıhyn uǵyndyryp, otansúıgishtik, alǵa umtylýshylyq sezimderin kúsheıte bergen abzal. Shyn patrıot bolǵan árbir qazaqstandyq Otanǵa qaltqysyz qyzmet qylady dep bilemiz. Sondyqtan bárimiz rámizderge qurmetpen qaraýymyz qajet», - dedi Almaty qalasynyń ardagerler keńesiniń tóraǵasy Ahan Bıjanov.
Memlekettik rámizderdiń túpki maqsaty memlekettikti dáıekteı túsetin aıshyqty belgi ekendigine mán berildi.
«Bizdiń memleketimizdiń rámizderiniń mańyzyna asa mán bergen jón. Dúnıejúzilik saıası arenada týymyzdyń máńgi jelbirep turýyn árbirimiz qalaımyz. Sondyqtan rámizderdiń sımvolıkasynyń uǵymy aıryqsha bolǵany asa qundy sanalady. Qazaq eliniń derbestigi máńgi bolsyn», - dedi saıasattanýshy Asqat Qasenǵalı.