2024 jyly «QTJ» UK» AQ qyzmettiń negizgi kórsetkishteri boıynsha turaqty damý ustanymyn saqtap qaldy.
Kompanıa júkterdi jáne jolaýshylardy turaqty tasymaldap, áleýmettik mindettemelerdi saqtady, aýqymdy jobalardy iske asyrdy, jańa logıstıkalyq sheshimder tapty, dep habarlaıdy aqshamnews.kz Rail-news.kz-ke silteme jasap.
Júk aınalymynda oń dınamıka saqtaldy, ol 272 mlrd tonna-kılometrdi qurady. Konteınerlik tranzıt senimdi qarqynmen ósýde, ol 1,4 mln JFE-ge jetti. Bıyl QHR-men tasymaldaý jospary merziminen buryn oryndaldy. Qazaqstan-Qytaı túıispeleri arqyly tasymaldaý kólemi shamamen 31,8 mln. tonnaǵa jetti, bul 2023 jyldan 12% artyq. Onyń ishinde, Qazaqstannan eksport 8,8% artyp, 13,7 mln tonnany qurady.
QTJ qyzmetiniń negizgi baǵyttarynyń biri ınfraqurylymdy jańǵyrtý boldy. 1400 km-den astam jol jóndeýdiń ár túrlerimen jańartyldy. 1 myń shaqyrymnan astam jańa temir jol qurylysy (Dostyq – Moıynty, Darbaza – Maqtaaral, Almaty stansıasynyń aınalma joly) jalǵasty. Dostyq – Moıynty ýchaskesindegi ekinshi joldy jáne Almatyny aınalyp ótetin temirjol jelisin kelesi jyly aıaqtaý josparlanýda.
Infraqurylymdyq jobalar iske qosylǵannan keıin tranzıttiń eki esege – jylyna 55 mln tonnaǵa deıin ulǵaıýy boljanýda. Qazaqstandyq dálizderge júk aǵyndaryn tartý úshin kompanıa termınaldyq jelini keńeıtedi. Qazirdiń ózinde bar 5 termınal (Lánúngan porty, Sıan qalasyndaǵy Qurǵaq port, Dostyq stansıasyndaǵy termınal, Khorgos Gateway Qurǵaq porty, Quryq portyndaǵy parom kesheni) aldaǵy eki jylda taǵy 9-men tolyqtyrady. Aǵymdaǵy jyly Almaty qalasynda, Ázirbaıjannyń Alát teńiz portynda, Vengrıa astanasy – Býdapeshtte, Máskeý mańyndaǵy Selátıno kentinde termınaldar qurylysy bastaldy. Qytaılyq seriktes – Lánúngan portymen birlesip, Aqtaý portynda konteınerlik hab salý bastaldy.
Aıta ketý kerek, 2024 jyly iske qosylǵan Sıan qalasynyń qurǵaq portyndaǵy qazaqstandyq-qytaılyq termınal Transkaspıı baǵdary boıynsha Qytaıdan tranzıtti 30 esege arttyrýǵa múmkindik berdi.
Sıngapýrlyq PSA-men yntymaqtastyqta ázirlengen jiksiz sıfrlyq dáliz marshrýttaǵy Qazaqstannyń rólin kúsheıtýde. Júk tasymaly salasyndaǵy klıenttik servısti tolyq sıfrlandyrýdy «Biryńǵaı sıfrlyq tereze» qamtamasyz etse, QTJ bunda kompanıanyń enshiles kásiporyndarynyń barlyq komersıalyq fýnksıalaryn biriktirdi. Júıe ýaqytty únemdeıdi jáne tasymaldaý prosesin múmkindiginshe ashyq etedi.
QTJ-nyń operasıalyq jáne qarjylyq turaqtylyǵyn Fitch, S&P halyqaralyq reıtıńtik agenttikteri taǵy da rastady.