Aqqala Olaf, aq aıý, Kıng-Kong, «Shrek» múltfılmindegi Zimbir adam, Jańa jyldyń sımvoly — shyrsha, sondaı-aq, Almatynyń sımvoly – qar barysy balalardy kele jatqan merekemen quttyqtady.
Bul maskottar 20 jeltoqsan kúni bastalǵan «Almatynyń 8 keremeti: otbasylyq mereke — tańǵajaıyp Jańa jyl» atty aýqymdy merekelik baǵdarlama aıasynda arnaıy jasalǵan, dep habarlaıdy aqshamnews.kz.
Ertegiler men múltfılm keıipkerleri balalarmen birge Astana alańynda, Abaı alańynda, Tuńǵysh Prezıdent saıabaǵynda, Arbatta, Panfılov kóshesinde jáne «Nurly taý» bıznes ortalyǵynyń aldyndaǵy alańda ótken sheberlik dáristeri men oıyndarǵa qatysty.
Balalar aǵashtan jasalǵan shyrsha oıynshyqtaryn boıap, ydystardy sýrettermen bezendirdi, mýzykalyq qobdıshalardy áshekeılep, gıpsten jasalǵan músinshelerge jan bitirdi. Olarǵa tájirıbeli qolónershiler baǵyt-baǵdar berip, kómektesip otyrdy. Ár qatysýshyǵa aljapqyshtar, qolǵaptar men kraft sómkeler berildi. Ýaqytyn qyzyqty ári paıdaly ótkizgen balaqaılar óz qoldarymen jasaǵan kádesyılardy estelik retinde úılerine alyp ketti.
Sheberlik dáristerin qolónershiler ǵana emes, sonymen qatar sırk jáne Qýyrshaq teatrynyń artıseri de ótkizdi. Balalar doppen jonglerlik ónerdi úırendi, arnaıy taqtaıda tepe-teńdikti saqtaýdy meńgerip, hýla-hýppen qyzyqty oıyndarǵa qatysty. Sonymen qatar, Almatydaǵy alańdarda Aıaz ata men Aqshaqardyń, ekvılıbrısterdiń, jonglerlerdiń qoıylymdary, suıyq azottyń áserimen ótkizilgen ǵylymı shoý jáne úıretilgen ıtterdiń nómirleri usynyldy. Ashyq aspan astynda Qýyrshaq teatrynyń artıseri qoıylymdaryn pash etse, «Alataý» teatrynyń jáne «Almaty áýenderiniń» ánshileri konsertterin ótkizdi.
Aıta keteıik, 30 jeltoqsan kúni Astana alańynda saǵat 17:00-den 18:30-ǵa deıin tańǵajaıyp sırk shoýy ótedi. Ekvılıbrıser tamasha trúkterimen tańǵaldyrsa, jonglerler doptardy, urshyq pen saqınalardy sheber meńgergenin kórsetedi. Atletter ózderiniń kúsh-qýaty men tózimdiligin tanytsa, saıqymazaq ınteraktıvti oıyndar men qoıylymdar arqyly kórermenderge qýanysh syılaıdy.
Baǵdarlamanyń sharyqtaý shegi – faer-shoý bolady. Onda artıser otpen jasalatyn erekshe trúkter kórsetip, halyqty tańqaldyrmaq. Odan keıin saǵat 18:30-dan 20:00-ge deıin sahnada «Ulytaý» áıgili etno-rok toby jáne «Alataý» dástúrli óner teatrynyń artıseri óner kórsetedi. Olar kórermenderge áserli kompozısıalar men umytylmas kóńil-kúı syılaıdy.
Sondaı-aq, 30 jeltoqsanda saǵat 18:30-dan 20:00-ge deıin Abaı alańynda Memlekettik qýyrshaq teatrynyń artıseri jarqyn emosıalar men jańa jyldyq sıqyrǵa toly merekelik baǵdarlama usynady. Keshtiń basty keıipkerleri Aıaz Ata, Aqshaqar, kóńildi qar adamdary jáne qonaqtardy qyzyqty oıyndarǵa, bılerge jáne fleshmobtarǵa tartatyn qýyrshaqtar bolady.
31 jeltoqsan kúni Almatyda estrada juldyzdardyń qatysýymen eki úlken konsert ótedi.
Abaı alańynda 19:00-den 21:00-ge deıin Búrkit, Aqbota-Nur, Dıana Ismaıl, Kenjebek Janábilov jáne basqa da artıser óner kórsetedi.
Astana alańynda konsert saǵat 21:00-de bastalyp, 2025 jyldyń 1 qańtary saǵat 01:00-de aıaqtalady. Tún jarymda otshashý bolady. QBTÝ aldyndaǵy sahnada Erseıit Álıev, Elbol Qýanbek, Uljan Aǵlaqova, Chingiz Typhoon, Makvin, Orynkhan, 6ellucci, Marhaba Sábı, Moldanazar jáne RaiM óner kórsetedi.
Merekelik is-sharaǵa daıyndyq jumystaryna baılanysty 31 jeltoqsanda saǵat 8:00-den bastap Tóle bı kóshesiniń Nazarbaev dańǵylynan Abylaı han dańǵylyna deıingi bóligi tolyǵymen jabylady. Jol qozǵalysy 2025 jyldyń 1 qańtarynda saǵat 02:00-de qaıta ashylady. Túsinistikpen qarap, aldyn ala qozǵalys baǵytyn josparlaýdy jáne jol qozǵalysy erejelerin qatań saqtaýdy suraımyz.