Senat depýtaty Darhan Qydyráli Úkimetke osyndaı usynys jasady, dep habarlaıdy Almaty-akshamy.kz.
Onyń sózine qaraǵanda, qazirgi oqýlyqta Qazaq handyǵynyń qalanǵandyǵy týraly naqty aqparat joqtyń qasy.
«Joshy ulysynyń irgesi qalanǵanyna 800 jyl tolýy qazaq halqynyń shynaıy tarıhyna mańyz berý úshin tamasha múmkindik bolyp otyr. Memleket basshysy taıaýda « Egemen Qazaqstan» gazetine bergen suhbatynda osy aıtýly datany eske salǵany belgili. Sondaı-aq memlekettiligimizdiń tamyry tereńde jatqanyn áıgileıtin aýqymdy zertteýler júrgizý mańyzdy ekenin atap ótti. Sondyqtan jańa oqýlyqta Joshynyń qazaq handarynyń atasy ekeni basa aıtylýy tıis», - dedi depýtat.
«Árıne ult tarıhyn bilmeý qasiret. Alaıda odan ótken úlken qasiret bar ol – tarıhty jańylys bilý. Ulttyq sanaǵa tarıhı sana negiz bolady desek burmalanǵan túsinikten qate tanym qalyptasady. Sondyqtan, tarıhty durys jazý jáne oqytý tarıhty jasaýmen birdeı ózekti. Bıyl aıaqtalatyn qazaqstan tarıhynyń kóptomdyǵy Joshy ulysyna qatysty tyń derekterdi usynady dep úmittenemiz. Mektep oqýlyqtary osy kóptomdyq negizinde qaıta jazylǵany abzal», -deıdi QR Parlamenti Senatynyń depýtaty Darhan Qydyráli.