İİM Kóshi-qon qyzmeti Qazaqstan tarapynan qabyldaýshy tulǵalar sheteldiktiń kelgeni týraly habarlaýǵa mindetti ekenin eske saldy, dep habarlaıdy Almaty-akshamy.kz Polisia.kz-ke silteme jasap.
“Qurmetti qazaqstandyqtar! Qonaq úılerdiń, hostelderdiń, pansıonattardyń, jataqhanalardyń ıeleri! Páterler men basqa da turǵyn úı-jaılardyń ıeleri, Sizderge sóz arnaımyn! Qazaqstan Respýblıkasynyń İshki ister mınıstirligi kóshi-qon zańnamasynyń talaptaryn qatań saqtaýǵa shaqyrady. “Kóship kelýshilerdiń Qazaqstan Respýblıkasyna kelýi men onda bolýy qaǵıdalarynyń” 9-tarmaǵyna sáıkes, sheteldik azamattardy qabyldaıtyn jeke jáne zańdy tulǵalar ózderine keletin kóship kelýshiler týraly İshki ister organdaryn habardar etýge mindetti ekenin túsindiremiz. Atalǵan habarlama sheteldik azamat kelgen kúnnen bastap úsh jumys kúni ishinde mindetti túrde beriledi. Osy merzimdi ótkizip alǵan jáne kóship kelýshiniń kelýi týraly İshki ister organdaryna habarlamaǵan jaǵdaıda, Qazaqstanda qabyldaýshy jeke jáne zańdy tulǵa Qazaqstan Respýblıkasy Ákimshilik quqyqbuzýshylyq týraly Kodeksiniń 518-baby boıynsha jaýaptylyqqa tartylatynyn eskertemiz. Zańdy tulǵalar úshin 10-nan 25 aılyq eseptik kórsetkishke deıin, al qaıtalanǵan jaǵdaıda 100 aılyq eseptik kórsetkishke deıin aıyppul qarastyrylǵan, bul 306 myń teńgege teń. Jeke tulǵalar úshin eskertý túrindegi jaza, al qaıtalap buzǵany úshin 30 aılyq eseptik kórsetkish nemese 91 890 teńge mólsherinde aıyppul kózdelgen. Sheteldiktiń kelýi týraly habarlamany qabyldaýshy tarap úsh tásilmen bere alatynyn habarlaımyz. Birinshi. Jeke jáne zańdy tulǵalar kóship kelýshiniń kelgeni týraly elektrondyq vızalyq jáne kóshi-qon portaly arqyly tikeleı habarlaı alady: vmp.gov.kz nemese egov.kz. Ol úshin qazaqstandyq tarapqa kóship kelýshiniń elektrondyq sıfrlyq qoltańbasy jáne pasporttyq derekteri jetkilikti. Ekinshi ádis. Qazaqstan tarapynan qabyldaýshy jeke jáne zańdy tulǵalar sheteldiktiń kelgeni týraly habarlamany tikeleı óz aýdany boıynsha ishki ister organdarynyń kóshi-qon qyzmetiniń bólimderi men bólimshelerine bere alady. Úshinshi ońaı ádis – Apr Store nemese Play Market-ten e-Qonaq qosymshasyn júkteý. Habarlama eki qadammen beriledi. Tipti, smartfonnyń kamerasynyń kómegimen tólqujatyn skanerleý arqyly sheteldiktiń tólqujat derekterin júkteý múmkindigi bar. Habarlamany avtorızasıalaý jáne toltyrý ıntýıtıvti. Bir mınýt ýaqyt alady. Jeke jáne zańdy tulǵalar zańnyń osy talaptaryn saqtaýǵa mindetti ekenine taǵy da nazar aýdaramyz. Sheteldik qonaqtar ózderiniń pasporttyq derekterin qabyldaýshy tarapqa habarlaýy jáne Qazaqstan Respýblıkasynyń zańnamasyn saqtaýy tıis”, – dedi İİM Kóshi-qon qyzmeti komıteti tóraǵasynyń m.a. Aslan Atalyqov.