Otandyq tankıster kásibı sheberlikterin udaıy arttyryp otyrady.
15 qyrkúıekte Qazaqstan Qarýly Kúshterinde Tankıster kúni atap ótiledi, dep habarlaıdy Almaty-akshamy.kz.
«Bul kúnniń tarıhy 1942 jyldan bastalady. Sol bir qaharly soǵys jyldary respýblıka jastary jınaǵan qarajatqa jasalǵan tankter legi Qazaqstannan maıdan dalasyna jiberilgen bolatyn»,- delingen Qorǵanys mınıstrliginiń baspasóz qyzmetiniń habarlamasynda.
1941 jyly Shymkent temirjolynyń eńbekshil jastarynyń bastamasymen búkil respýblıka boıynsha bir jyl ishinde tank legin qurýǵa jetetin aqshalaı qarajat jınaldy. 1942 jylǵy 15 qyrkúıekte «Qazaqstan komsomoly» degen jazýy bar 46 tank áskerlerge berildi. Bul jaýyngerlik mashınalar Uly Otan soǵysynyń shaıqastaryna qatysty. Keıbir kýágerlerdiń esteligine súıensek, Berlın túbindegi shaıqastarǵa da Qazaqstanda jasalǵan birneshe tank qatysqan.
Búgingi tańda soǵys taktıkasyndaǵy aıtarlyqtaı ózgeristerge jáne qarý-jaraqtyń jańa túrleriniń paıda bolýyna qaramastan, tankter álemniń kóptegen damyǵan elderi armıalarynyń negizgi jaýyngerlik quramdas bóligi bolyp qala beredi. Senimdi saýyty, joǵary manevrlik jáne atys qýatynyń arqasynda tankter jerdegi urys kezinde keńinen qoldanylyp keledi.
Otandyq tankıster jaýyngerlik ázirligi men qabiletin arttyrý úshin únemi kásibı sheberligin jetildirý, jańa taktıkalyq tásilderdi engizý boıynsha jumys isteýde. Qazirgi zamanǵy qarýly qaqtyǵystardyń tájirıbesine súıene otyryp, Qazaqstan áskeri de qarsylasqa toıtarys berýge jáne shyǵyndardy azaıtýǵa múmkindik beretin «Tank karýseli» jáne «Saq qorǵany» jaýyngerlik mashınalaryn qoldaný tásilderi sátti synaldy.
Tank bólimsheleriniń tapsyrmalardy sapaly oryndaýy kóbinese ekıpajdardyń sheber jáne úılesimdi áreketterine baılanysty. Sol sebepti tankısterdi daıyndaýǵa kóp kóńil bólinedi. Ofıser kadrlardyń basty ustahanasy – Almatydaǵy Qurlyq áskerleriniń áskerı ınstıtýty. Al tank áskerleriniń kishi mamandaryn oqytý Gvardeısk garnızonyndaǵy oqý-jattyǵý ortalyǵynda júzege asyrylady.
Jaýyngerlik dástúrdi jalǵastyrýshy qazaqstandyq tankıster kásibı merekeleri qarsańynda chellendj uıymdastyryp, ony Qarýly Kúshterdegi áriptesteri túgel qoldady. El qaýipsizdiginiń senimdi qalqany bolǵan jaýynger-tankıster oqý-jaýyngerlik tapsyrmalardy tolyq oryndap, kásibı sheberlikterin udaıy arttyryp otyrady.