QR Sıfrlyq damý, ınovasıalar jáne aeroǵarysh ónerkásibi mınıstrligi men Starlink kompanıasy (SpaceX-tiń enshiles qurylymy) spýtnıktik ınternet qyzmetin Qazaqstan aýmaǵynda resmı iske qosý týraly kelisimge qol qoıdy.
Qujat kompanıanyń elimizdiń aqparattyq qaýipsizdik jáne baılanys salasyndaǵy zańnamasyn tolyq saqtaı otyryp jumys isteýin kózdeıdi, dep habarlaıdy aqshamnews.kz.
Qujat Qazaqstan halqy úshin Starlink spýtnıktik termınaldaryn resmı túrde satýdy iske qosýdy kózdeıdi – satylymdar 2025 jyldyń úshinshi toqsanynda bastalady dep josparlanyp otyr.
Jobany iske asyrý – eldiń shalǵaı óńirlerin joǵary jyldamdyqtaǵy spýtnıktik ınternetpen qamtamasyz etýde mańyzdy qadam bolmaq. Bul sıfrlyq baılanys múmkindikterin keńeıtip, telekomýnıkasıalyq ınfraqurylymdy damytýǵa tyń serpin beredi.
Joǵary jyldamdyqty ınternetke Starlink arqyly qosylý aýyldyq mektepter, medısınalyq mekemeler, mobıldi toptar men ınfraqurylym nysandaryna sapaly baılanysqa qol jetkizýge múmkindik beredi. Bul ásirese talshyqty-optıkalyq jelilerdi ekonomıkalyq nemese tehnıkalyq turǵydan tartýǵa qıyndyq týdyratyn óńirlerde ózekti bolyp otyr.
«Qazaqstan — aýmaǵy keń, halqy ár óńirge shashyrańqy ornalasqan el. Barlyq turǵyndardy sapaly ınternetpen qamtý úshin talshyqty-optıkalyq baılanys jelilerinen uıaly baılanys munaralaryna deıingi túrli tásilderdi qoldanamyz. Alaıda jaıylymdar, taýly aýyldar men shalǵaıdaǵy kásiporyndar sıaqty qoljetimdiligi kúrdeli aımaqtar da bar. Ondaǵy turǵyndar da sapaly ınternetke qol jetkizýge tıis. Qazirgi tańda álemde buǵan múmkindik beretin tehnologıalar bar. Búginge deıin Starlink elimizde tek mektepterge ınternet usynyp, pılottyq rejımde jumys istep keldi. Al halyq úshin ol resmı túrde qoljetimsiz edi. Endi biz kelisimge keldik, kompanıa aqparattyq qaýipsizdik pen baılanys salasyndaǵy ulttyq zańnama talaptaryna saı jumys isteıtin bolady. Bıyl qajetti jumystar júrgizilip, turǵyndar resmı ári zańdy túrde spýtnıktik ınternetke qosyla alady», — dedi mınıstr Jaslan Madıev.
Starlink jabdyqtaryn zańdastyrý men resmı qoldaný mártebesiniń erekshe mańyzy bar: endi azamattar termınaldardy zańdy túrde satyp alyp, paıdalanyp, Qazaqstan Respýblıkasynyń zańnamasyna sáıkes tirkeı alady.
Starlink spýtnıktik ınternetine qosylý arnaıy paıdalanýshy qurylǵylary arqyly iske asady. Qazirgi ýaqytta jeke paıdalanýshylarǵa qyzmet kórsetý tártibin qosa alǵanda, tehnıkalyq jáne uıymdastyrýshylyq máselelerdi kelisý jumystary júrgizilýde.
Jobany iske asyrýdyń barlyq kezeńderi ulttyq zańnama talaptaryn, sonyń ishinde qaýipsizdik talaptaryn saqtaı otyryp júrgiziledi.
Bul bastama QR Prezıdenti Qasym-Jomart Toqaevtyń qala men aýyl arasyndaǵy sıfrlyq teńsizdikti azaıtý jónindegi tapsyrmasyn oryndaý aıasynda jáne «Qoljetimdi ınternet» ulttyq jobasynyń maqsattaryna sáıkes qolǵa alynýda.