Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Lúksembýrg Uly Gersogtigine resmı sapar jasady.
Sapar barysynda Qazaqstannyń syrtqy saıası vedomstvosynyń basshysy Lúksembýrg Premer-Mınıstri Lúk Frıdenmen jáne Lúksembýrg Premer-Mınıstriniń orynbasary – Syrtqy ister jáne syrtqy saýda mınıstri Ksave Bettelmen kezdesti, dep habarlaıdy aqshamnews.kz Syrtqy ister mınıstrligine silteme jasap.
Taraptar Qazaqstan men Lúksembýrg arasyndaǵy yntymaqtastyqtyń negizgi máselelerimen qatar qarjy tehnologıalary, «jasyl» energetıka arqyly turaqty damý, farmasevtıka jáne kólik ınfraqurylymy jobalary sıaqty keleshegi bar baǵyttardy talqylady. Eki eldiń iskerlik qoǵamdastyqtary úshin múmkindikterdi keńeıtý jáne ekonomıkalyq baılanystardy nyǵaıtý qajettiligi rastaldy.
Premer-Mınıstr Lúk Frıden «Lúksembýrg Qazaqstandy Ortalyq Azıadaǵy senimdi seriktes retinde qarastyratynyn jáne elderimiz arasyndaǵy saýda-ekonomıkalyq yntymaqtastyqty odan ári tereńdetý úshin úlken áleýet bar ekenin» atap ótti. Ol qazaq tarapynyń ekonomıkanyń negizgi salalaryn jańǵyrtý jáne ozyq tehnologıalardy engizý jónindegi umtylystaryn qoldaýǵa daıyn ekenin bildirdi.
Óz kezeginde, Qazaqstan SİM basshysy Lúksembýrgty Qazaqstannyń Eýropalyq Odaqtaǵy mańyzdy seriktesi retinde atap ótti. 2005 jyldan bastap Lúksembýrgten Qazaqstanǵa tikeleı ınvestısıalardyń jalpy aǵyny 2,9 mlrd AQSH dollaryn qurady.
Taraptar Qazaqstan men Eýropalyq Odaq arasyndaǵy ózara is-qımyl máselelerine de nazar aýdaryp, saýda-ekonomıkalyq baılanystardy keńeıtýge, sondaı-aq Ortalyq Azıadaǵy qaýipsizdik pen turaqtylyq máseleleri boıynsha yntymaqtastyqqa erekshe kóńil bóldi. Sonymen qatar taraptar halyqaralyq kún tártibindegi ózekti máseleler boıynsha pikir almasty.
Lúksembýrg Syrtqy ister mınıstri K. Bettel Qazaqstannyń óńirlik qaýipsizdikti nyǵaıtýdaǵy kúsh-jigerin joǵary baǵalaıtynyn atap ótti. Elderimizdi jahandyq syn-qaterlerge qatysty ortaq kózqarastar biriktiretini aıtyldy. Lúksembýrg Qazaqstanmen halyqaralyq qaýipsizdik jáne ornyqty damý máseleleri boıynsha yntymaqtastyqty keńeıtýge daıyn, óıtkeni BUU jáne basqa da halyqaralyq uıymdar sheńberinde beıbitshilik pen turaqtylyqty nyǵaıtý baǵytynda birlesken jumys úshin úlken múmkindikter bar dep sanaıdy.
Kezdesýler sońynda taraptar ekijaqty qarym-qatynastardy barlyq deńgeıde nyǵaıtýǵa jáne óńirlik pen jahandyq mańyzdy máselelerdi sheshýde halyqaralyq uıymdar aıasynda belsendi yntymaqtastyq ornatýǵa nıetti ekenin rastady.