BUU Bas Assambleıasy 79-shy sesıasynyń joǵary deńgeıdegi aptalyǵy qarsańynda Uıymnyń shtab-páterinde «Erteńgi kún úshin kópjaqty sheshimder» taqyrybynda eki kúndik «Bolashaq samıti» bastaldy.
Samıt jumysyna Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý bastaǵan qazaqstandyq delegasıa qatysty, dep habarlaıdy aqshamnews.kz.
Bul jahandyq is-shara BUU Bas hatshysy Antonıý Gýterrıshtiń bastamasymen ótkizilip, qazirgi tańdaǵy jáne keleshekte týyndaıtyn máselelerdiń birlesken sheshimderin tabýǵa baǵyttalǵan.
Samıttiń ashylýynda BUU Basshysy HHİ ǵasyrdyń syn-qaterleri HHİ ǵasyrdyń sheshimderin talap etedi: jan-jaqty jáne ınklúzıvti, sondaı-aq búkil adamzattyń tájirıbesine súıenetin negizdemelik sheshimder.
«Men bul Samıtte BUU Jarǵysynyń qundylyqtaryna negizdelgen jahandyq ınstıtýttardy zańdy, ádil jáne tıimdi etý úshin tereń reformalardy qarastyrýǵa shaqyrdym», – dedi Bas hatshy.
Samıtke BUU-ǵa múshe elderdiń memleketter men úkimetterdiń basshylary, syrtqy ister mınıstrleri, sondaı-aq halyqaralyq uıymdar men azamattyq qoǵam ókilderi qatysty.
Sapardyń alǵashqy kúni QR Syrtqy ister mınıstri M.Nurtileý Serbıanyń Syrtqy ister mınıstri Marko Djýrıchpen, Albanıanyń Syrtqy ister mınıstri Iglı Hasanımen, Angolanyń Syrtqy ister mınıstri Tete Antonıomen jáne Mońǵolıanyń Syrtqy ister mınıstri Batmýnhıın Batsesegpen ekijaqty kezdesýler ótkizdi.
Kelissózder barysynda saıası, saýda-ekonomıkalyq jáne mádenı-gýmanıtarlyq salalardaǵy ekijaqty yntymaqtastyqtyń qazirgi jaǵdaıy men damý perspektıvalary talqylandy.
Taraptar jahandyq jáne halyqaralyq kún tártibindegi ózekti máseleler boıynsha pikir almasty, sondaı-aq ózara is-qımyldyń barlyq baǵyttary boıynsha syndarly dıalogty jalǵastyrýǵa ýaǵdalasty.