Quramynda MSAK mamandary, QR DSM qurylymdyq bólimsheleriniń jáne vedimistik baǵynysty uıymdardyń basshylary bar qazaqstandyq delegasıa DDU-nyń MSAK jónindegi geografıalyq qashyqtaǵy ofısimen áriptestikte Shvesıaǵa bardy, dep habarlaıdy almaty-akshamy.kz
Ózderińiz biletindeı, 2022 jyldyń naýryz aıynda Almaty oblysynyń Eńbekshiqazaq aýdanynda eýropalyq óńirde DDU-nyń MSAK boıynsha alǵashqy demonstrasıalyq platformasy ashyldy. Basqa elderdiń densaýlyq saqtaý sarapshylary MSAK qyzmetterin kórsetý úshin kópbeıindi komandalardy uıymdastyrýdaǵy Qazaqstannyń tájirıbesin zerdeleı alady. Osy platformanyń negizinde Qazaqstanda Armenıa, Ózbekstan, Qyrǵyzstan, Tájikstan jáne t. b. delegasıalar oqytyldy.
Elderdiń Qazaqstan mysalynda MSAK-ty uıymdastyrýdyń tabysty praktıkalaryn oqytýǵa múddeliligi eskerile otyryp, Shvesıada sıfrlyq sheshimderdiń kómegimen shalǵaıdaǵy, halqy az aýyldyq óńirlerde MSAK qyzmetterin uıymdastyrýdy oqytý jáne meıirgerlerdiń quzyretterin keńeıtý úshin MSAK boıynsha DDU-nyń ekinshi demonstrasıalyq platformasy ashyldy.
Qazaqstan Shvesıada densaýlyq saqtaý salasynda tájirıbe almasý baǵdarlamasyna qatysý úshin DDU shaqyrǵan alǵashqy elderdiń biri boldy.
Sapardyń barysynda Shvesıanyń Densaýlyq saqtaý jáne áleýmettik ister mınıstrliginiń, basqa da memlekettik vedomstvolardyń ókilderimen, salalyq sarapshylarmen, ǵylymı toptardyń ókilderimen kezdesýler ótkizildi. Ózekti máseleler talqylandy, densaýlyq saqtaý qyzmetterine teń qoljetimdilikti qamtamasyz etý jáne medısınalyq kómektiń sapasyn arttyrý, pasıentterdiń múmkindikterin keńeıtý jáne Shvesıa mysalynda úzdik praktıkalarmen almasý úshin qashyqtyqtan sıfrlyq sheshimderdi zerdeleý ótti.
Qazaqstan delegasıasy Shved tarapymen odan ári áriptestikti jalǵastyrýǵa qyzyǵýshylyq bildirip, MSAK-ty jaqsartý jáne pasıentterdiń qajettilikterin qanaǵattandyrý úshin medısınalyq kómektiń qoljetimdiligi men sapasyn arttyrý jónindegi kúsh-jigerdi biriktirýdiń mańyzdylyǵyn atap ótti.