Bıylǵy jyldyń bes aıynda 184 shart jasalǵan.
Sońǵy úsh jylda elimizde sharýalardyń saqtandyrýǵa qyzyǵýshylyǵy aıtarlyqtaı ósti, dep habarlaıdy Almaty-akshamy.kz ElDala.kz cilteme jasap.
Agrosektorda saqtandyrý sharttarynyń sany 2 esege artty: eger 2020 jyly 93 shart jasalǵan bolsa, osy jyldyń 5 aıynda ósimdik jáne mal sharýashylyǵynda 184 saqtandyrý shartyna qol qoıyldy. Bul týraly ElDala.kz Agrarlyq nesıe korporasıasynyń baspasóz qyzmetine silteme jasaı otyryp habarlaıdy.
«Jyl saıyn agrosaqtandyrýǵa degen qyzyǵýshylyq artyp keledi. Eger 2020-2021 jyldary 254 shart jasalyp, 265,7 myń gektardan astam, 2,6 mln bas janýarlar men qustar (sonyń ishinde – iri jáne usaq mal, jylqy men qus) saqtandyrylǵan bolsa, bıylǵy jyldyń 5 aıynda 184 shart jasalyp, 308 myń gektar jáne 60 myńnan astam aýyl sharýashylyǵy janýarlary men qustary saqtandyrylǵan»,- dep habarlady Agrarlyq nesıe korporasıasynyń baspasóz qyzmeti.
Erikti saqtandyrý júıesi jumysynyń alǵashqy eki jylynda aýyl sharýashylyǵy taýarlaryn óndirýshiler saqtandyrý sharttaryn jasasýǵa 350 mln teńge baǵyttady, memleket taǵy 350 mln teńge sýbsıdıa túrinde tóledi. Osylaısha, memleket saqtandyrý shartyn jasasý kezindegi shyǵystardyń 50% ózine aldy. Nátıjesinde agrarıılerge saqtandyrý jaǵdaıynyń bastalý faktisi boıynsha tólemder somasy 1 mlrd 333 mln teńgeni qurady.
AKK aǵymdaǵy jyldyń 5 aıynda tólengen sýbsıdıa kólemi 500 mln teńgeden asqanyn atap ótti.
«2004 jyldan beri qoldanysta bolǵan saqtandyrý júıesi mindetti boldy jáne tek ósimdik sharýashylyǵyn ǵana qamtydy. 2020 jyldan bastap Qazaqstanda erikti júıe jumys isteıdi, ol agrosektordyń kez kelgen baǵytynda saqtandyrý úshin múmkindikter beredi. Búgingi saqtandyrý ónimderine ósimdik sharýashylyǵyn ylǵaldyń jetispeýshiliginen jáne artyǵynan saqtandyrý, sondaı-aq iri qara, jylqy, qoı, qustardy saqtandyrý kiredi», - dep túsindirdi ANK-da.
Korporasıada atap ótkendeı, memleket saqtandyrý syıaqylaryn sýbsıdıalaý túrinde qoldaý kórsetedi, bul sharýalardyń shyǵyndaryn azaıtýǵa múmkindik beredi. Saqtandyrý sharty baǵasynyń 50% agrarıı tóleıdi, 50% memleket sýbsıdıalaıdy. Bul maqsattarǵa 2020-2021 jyldary 3,5 mlrd teńge bólindi.
Saqtandyrý shartyn jasasý úshin eshqaıda barýdyń qajeti joq: www.qoldau.kz platformasynda elektrondyq-sıfrlyq qoltańbanyń kómegimen saqtandyrý shartyn jasasý onlaın qoljetimdi.
ANK derekteri boıynsha Qazaqstandaǵy agrosaqtandyrý júıesine álemdik naryqtaǵy «A» reıtıńimen halyqaralyq qaıta saqtandyrý kompanıalary tartylǵan. Olar otandyq kompanıalar ózine alatyn táýekelderdi qaıta saqtandyrady. Bul saqtandyrý jaǵdaılary bastalǵan kezde kepildendirilgen tólemderdi qamtamasyz etedi.
Esterińizge sala keteıik, 2021 jyldyń jeltoqsan aıynan bastap agrosaqtandyrý operatory «Báıterek» holdıńiniń enshiles uıymy - Agrarlyq nesıe korporasıasy bolyp tabylady.