2024 jylǵy 30 jeltoqsanda QR Úkimeti «Qazaqstan Respýblıkasynyń Prezıdenti janyndaǵy Qazaqstan Respýblıkasynyń Ulttyq ǵylym akademıasy týraly keıbir máseleler» atty Qaýlyny qabyldady. Bul týraly Vecher.kz habarlaıdy.
Qujatta: «Qazaqstan Respýblıkasynyń Prezıdenti janyndaǵy Qazaqstan Respýblıkasynyń Ulttyq ǵylym akademıasy» komersıalyq emes aksıonerlik qoǵamyn Qazaqstan Respýblıkasynyń Prezıdenti janyndaǵy Qazaqstan Respýblıkasynyń Ulttyq ǵylym akademıasy mártebesindegi eń joǵarǵy ǵylymı uıymǵa qaıta qurý» dep kórsetilgen.
Akademıanyń negizgi qyzmet túrleri:
Qazaqstannyń áleýmettik-ekonomıkalyq damý basymdyqtaryna sáıkes ǵylym men ǵylymı-tehnıkalyq qyzmettiń basym baǵyttaryn anyqtaý boıynsha usynystar ázirleý;
Ǵylym men tehnologıalardyń strategıalyq basym baǵyttaryn taldaý jáne ony Prezıdent janyndaǵy Ulttyq ǵylym jáne tehnologıalar keńesine usyný;
Baǵdarlamalyq-nysanaly qarjylandyrý úshin usynylǵan ǵylymı-tehnıkalyq tapsyrmalardy saraptamadan ótkizý;
Ǵylymnyń damý bolashaǵy boıynsha boljamdyq zertteýler daıyndaý;
Ǵylym salasyndaǵy ataýly syılyqtar men stıpendıalarǵa arnalǵan baıqaýlar ótkizý;
Ǵylym men tehnıka salasynda zertteýler júrgizý;
Ǵylymı jýrnaldar shyǵarý;
Halyqaralyq ǵylymı jáne ǵylymı-tehnıkalyq yntymaqtastyqty damytýǵa qatysý;
Ǵylymdy nasıhattaýǵa qatysý.
Qazaqstan Respýblıkasynyń Prezıdenti janyndaǵy Ulttyq ǵylym akademıasy – eldegi túrli bilim salalary boıynsha jetekshi ǵalymdar men zertteýshilerdi biriktiretin jalǵyz joǵarǵy ǵylymı uıym. Akademıa Qazaqstanda ǵylym, tehnologıa jáne ınovasıalardy damytýda mańyzdy ról atqarady, ǵylymı zertteýlerdi ilgeriletip, bilim taratýǵa jáne halyqaralyq yntymaqtastyqty nyǵaıtýǵa yqpal etedi.
Aqylbek Kúrishbaev:
– Ótken jyly Akademıa janynan analıtıkalyq ortalyq qurylyp, elimizdegi ǵylymnyń jaǵdaıy taldandy, eldiń ǵylymı áleýetiniń derekter bazasy jasaldy. Baǵdarlamalyq-nysanaly qarjylandyrý aıasynda 113 ǵylymı-tehnıkalyq tapsyrma saraptamadan ótkizildi. Halyqaralyq yntymaqtastyqty damytý sheńberinde álemniń jetekshi ǵylymı uıymdarymen 27 memorandýmǵa qol qoıyldy. Olardyń negizinde nemis, koreı jáne qytaılyq zertteý qurylymdarymen birge úsh halyqaralyq ǵylymı ortalyq ashylyp, AQSH jáne Qytaı ǵylym akademıalarymen úsh halyqaralyq ǵylymı joba júzege asyryla bastady. Biz ǵylym salasynda jańa jetistikter men transformasıalardyń aldynda turmyz. Bizdiń maqsat – Qazaqstandy Ortalyq Azıadaǵy ǵylymı zertteýlerdiń kóshbasshysy etý. Ǵylym akademıasy jańa ıdeıalar men usynystarǵa ashyq, – dep atap ótti Ulttyq ǵylym akademıasynyń Prezıdenti Aqylbek Kúrishbaev.
Eske salsaq, 2024 jyldyń 20 jeltoqsanynda Almaty qalasynda ǵylymı qaýymdastyqqa Prezıdent janyndaǵy Ulttyq ǵylym akademıasynyń jańa saılanǵan akademıkteri tanystyryldy.