Qazaqstan Respýblıkasynyń Ádilet mınıstrligi «Ádilet» normatıvtik quqyqtyq aktileriniń aqparattyq-quqyqtyq júıesinde jasandy ıntellekt negizindegi zań konsýltanty – jańa sıfrlyq servıstiń iske qosylǵany týraly habarlaıdy.
Birinshi kezeńde zamanaýı jasandy ıntellekt tehnologıalaryna negizdelgen «Ádilet» zań keńesshisiniń pılottyq nusqasy júzege asyryldy. Qazir atalǵan ónim synaqtan ótýde. Konsýltanttyń negizgi mindeti – normatıvtik quqyqtyq aktilerdi taldaý jáne azamattarǵa jedel jáne qoljetimdi zań kómegin kórsetý.
Qural paıdalanýshylarǵa ınteraktıvti formatta zańnamalyq máseleler boıynsha túsinikteme alýǵa, sondaı-aq Qazaqstan Respýblıkasynyń quqyqtyq salasynda jyldamyraq sharlaýǵa múmkindik beredi. AI qoldaný azamattardyń quqyqtyq júıemen ózara árekettesý tıimdiligin arttyrady jáne halyqtyń quqyqtyq saýattylyǵyn arttyrýǵa kómektesedi.
Jobanyń ekinshi kezeńi JI keńesshisiniń fýnksıonaldyǵyn keńeıtýdi qamtıdy. Normatıvtik quqyqtyq aktilerdegi qaıshylyqtardy avtomatty túrde anyqtaý, zańdy tehnıkalyq talaptardyń saqtalýyn tekserý, múmkin bolatyn quqyqtyq qaıshylyqtardy boljaý, sondaı-aq basqa da taldaý fýnksıalaryn júzege asyrý tetikterin engizý josparlanýda.
«Ádilet» sıfrlyq zań konsýltantyn engizý quqyqtyq salanyń aýqymdy sıfrlyq transformasıasynyń bir bóligi bolyp tabylady jáne quqyqtyq aqparattyń ashyqtyǵyn, qoljetimdiligin jáne sapasyn arttyrýǵa baǵyttalǵan.