Shara barysynda mamandar ózara tájirıbelik is-qımyldar men birlesken jobalardy uıymdastyrý máselelerin talqylady.
Qazaqstan Respýblıkasy Prezıdentiniń Arhıvinde TMD elderiniń arhıv mekemeleri basshylarynyń kásibı kezdesýi ótti, dep habarlaıdy Almaty-akshamy.kz.
İs-sharaǵa Armenıa, Ázirbaıjan, Qazaqstan, Qyrǵyzstan, Ózbekstan jáne Reseı arhıvshileri qatysty.
İs-sharany ashqan Qazaqstan Respýblıkasy Prezıdenti Arhıviniń dırektory Á.Q.Mustafına Arhıvtiń qyzmeti, qol jetkizgen nátıjeleri, jańa bastamalary men perspektıvalyq josparlary, sondaı-aq aǵymdaǵy jyldyń maýsymynda bekitilgen Arhıv qyzmetin jetildirý jáne jańartý jónindegi sharalar kesheni aıasynda ázirlengen Arhıvti damytýdyń 2035 jylǵa deıingi tujyrymdamasy týraly aıtyp berdi. Álıa Qusaıynqyzy bilim berý jobalaryna, atap aıtqanda, jas arhıvshilerdiń halyqaralyq mektebi týraly toqtalyp, 2023 jyly Almatyda uıymdastyrylatyn kelesi jastar forýmyna shaqyrdy. QR Prezıdentiniń Arhıvi usynyp otyrǵan taǵy bir halyqaralyq jobasy - arhıv isiniń ózekti máseleleri boıynsha usynystar men sheshimderdi talqylaý jáne qabyldaý úshin kásibı qaýymdastyqtyń turaqty jumys isteıtin halyqaralyq únqatysý alańyn qurýǵa baǵyttalǵan «Ashyq qoǵamǵa – ashyq arhıv» arhıvshiler kongresi bolyp tabylady. Kezdesý qonaqtaryn aǵymdaǵy jyldyń qazan aıyna josparlanǵan arhıvshilerdiń I Kongresiniń jumysyna qatysýǵa shaqyrdy.
Arhıvshi áriptesterge arnaıy ekskýrsıa uıymdastyrylyp, olar arhıvtiń oqý zaly men kitaphananyń jumysymen, arhıvtik qujattardy sıfrlandyrý, mıkrofılmdeý jáne qalpyna keltirý prosesterin kórip shyqty. Ekskýrsıa barysynda arhıv qyzmetkerleri áriptesterimen óz tájirıbelerimen bólisip, kóptegen suraqtarǵa jaýap berdi, zamanaýı arhıv jabdyqtaryn qoldaný jóninde pikir almasty. Sonymen qatar qonaqtarǵa M.Q.Qozybaev pen J.Sh.Shaıahmetovtyń jeke tektik qorlary boıynsha daıyndalǵan qujattar jınaqtary jáne Qazaqstan Respýblıkasy Prezıdenti Arhıviniń qorlary boıynsha 2021 jyly basylyp shyqqan jónsilter syıǵa berildi.
Kezdesýge TMD Atqarýshy komıteti Ekonomıkalyq yntymaqtastyq departamentiniń konsýltanty M.A. Kýlagına; Ázirbaıjan Respýblıkasy Ulttyq arhıvi basqarmasynyń jarıalaý jáne paıdalaný bóliminiń meńgerýshisi N.S. Emınov; Armenıa Respýblıkasynyń Ulttyq arhıviniń dırektory G.M.Arshakán; Qazaqstan Respýblıkasy Mádenıet jáne Sport Mınıstrliginiń arhıv isi jáne qujattama Komıtetiniń tóraǵasy B.Q.Borash jáne ýákildi tulǵalar qatysty.
Kezdesý barysynda jınalǵandar TMD elderiniń arhıv mekemelerimen ózara tájirıbelik is-qımyldar men birlesken jobalardy uıymdastyrý máselelerin talqylady.