QR UQK men İİM Reseılik Federaldyq qaýipsizdik qyzmeti jáne İİM-men birge arnaıy operasıa ótkizdi, dep habarlaıdy Almaty-akshamy.kz QR UQK baspasóz qyzmetine silteme jasap.
Memleket basshysy tapsyrmasynyń aıasynda Qazaqstan Respýblıkasy Ulttyq qaýipsizdik komıteti men İshki ister mınıstrligi uıymdasqan qylmystyń eldegi áleýmettik-ekonomıkalyq jaǵdaıǵa tıgizetin áserin tómendetý boıynsha jumysty jalǵastyrýda.
2022 jylǵy 3 qańtarda QR UQK men İİM Reseılik Federaldyq qaýipsizdik qyzmeti jáne İİM-men birge Baıqońyr qalasynda quramyna Qazaqstan jáne Reseı azamattary kirgen qoǵamǵa qaýipti uıymdasqan qylmystyq toptyń jolyn kesý boıynsha birlesken arnaıy operasıany iske asyrdy.
Bir ýaqytta Astana, Qyzylorda jáne Qonaev qalalarynda atalǵan toptyń kómekshileri ustaldy. Jalpy, arnaıy operasıa barysynda uıymdasqan qylmystyq toptyń 18 basshysy men belsendi músheleri ustaldy. Olardyń turǵylyqty jerleri boıynsha atys qarýy, aqshalaı qarjy jáne tergeý úshin qyzyǵýshylyq týdyratyn ózge de materıaldar alyndy.
Qylmystyq toptyń adam urlaýǵa, bopsalaýǵa, qarýmen qaraqshylyq shabýyldaýǵa jáne urlyqqa qatysy bary anyqtaldy. Qylmystyq elementter uzaq ýaqyt boıy Baıqońyr qalasy jáne Qyzylorda oblysyndaǵy qylmystyq ahýalǵa keri áser etip kelip, aýyr jáne asa aýyr qylmystardy jasaýdaǵy qatygezdikterimen erekshelengen.
Mysaly, 2022 jylǵy qyrkúıekte qylmystyq toptyń qatysýshylary arasyndaǵy qarýly qaqtyǵys saldarynan kósheden ótip bara jatqan beıbit adamǵa oq tıip, oqıǵa ornynda kóz jumǵan.
UQK qyzmetkerleri arnaıy operasıany prokýratýramen kelise otyryp, jedel izdeý jáne tehnıkalyq is-sharalardyń keshenin júrgizý arqyly kóp aılar boıy tyńǵylyqty ázirlep kelgen.
Qazirgi ýaqytta sot aldy tergeý aıasynda ustalǵandardyń ózge de qylmystarǵa qatysynyń bar-joǵy tekserilýde jáne qajetti tergeý amaldary júrgizilýde.